उपराष्ट्रपति  यादव र बङ्गलादेशी कार्यवाहक राजदूत मोहम्मद हुमायूँ कबीर बीच शिष्टाचार भेटवार्ता

ईमधेश न्यूज सम्वादादता,
काठमाडौं, २१ चैत्र ।
उपराष्ट्रपति रामसहाय प्रसाद यादव र बङ्गलादेशी कार्यवाहक राजदूत मोहम्मद हुमायूँ कबीर बीचको शिष्टाचार भेटवार्ता भएको छ, जसमा दुई मुलुक बीचको द्विपक्षीय सम्बन्धका विविध आयाममा छलफल भएको छ। उपराष्ट्रपति यादवले बङ्गलादेश र नेपाल बीचको मैत्रीपूर्ण सम्बन्धको महत्त्व र व्यापार, ऊर्जा, पर्यटन र सांस्कृतिक सहकार्यलाई जोड दिएका छन्।
यादवले नेपाल र बङ्गलादेश बीचको व्यापार वृद्धिका अवसरहरू र ट्रान्जिट सहकार्यको महत्त्वलाई उल्लेख गर्दै, जलविद्युत् र ऊर्जा क्षेत्रका सम्भावनाहरूमा सहकार्यको प्रस्ताव गरे। उनले नेपाल र बङ्गलादेश बीच त्रिपक्षीय पावर सेल्स एग्रीमेन्ट (पीएसए) को स्वागत गरे र यसलाई ऐतिहासिक कदम मान्ने कुरा पनि बताए।
कार्यवाहक राजदूत कबीरले पर्यटन विकासमा जोड दिँदै, नेपाल र बङ्गलादेशका प्रमुख पर्यटकीय गन्तव्यहरूको विकासका लागि सहकार्य गर्ने कुरा व्यक्त गरे। बङ्गलादेशले नेपालका लागि उच्च शिक्षा, विशेष गरी चिकित्सा र इन्जिनियरिङ्गका क्षेत्रहरूमा छात्रवृत्तिहरू प्रदान गरेकोमा धन्यवाद पनि ज्ञापन गरिएको छ।
भेटमा दुई मुलुक बीचको सहकार्यको भविष्यको बारेमा आशावादी दृष्टिकोण व्यक्त गर्दै, उपराष्ट्रपति यादवले बङ्गलादेशको राष्ट्रिय दिवसको अवसरमा राष्ट्रपति महम्मद शाहबुद्दिन र बङ्गलादेशी जनतालाई शुभकामना पनि दिएका थिए।