संयुक्त विद्यार्थी संगठनद्वारा हिंसात्मक घटनाको विरोध

ईमधेश न्यूज सम्वाददाता,
काठमाडौं, १८ चैत्र ।
 संयुक्त विद्यार्थी संगठनहरूले २०८१ चैत १५ गते कथित राजावादी समूहद्वारा आयोजित प्रदर्शनको क्रममा भएको हिंसात्मक गतिविधि, आगजनी, पत्रकार हत्या, तोडफोड र लुटपाट जस्ता घटनाप्रति गम्भीर ध्यानाकर्षण भएको बताएका छन्।
विद्यार्थी संगठनहरूले जनताको असन्तुष्टिलाई दुरुपयोग गरी प्रतिगमनको दुष्प्रयास गर्न खोजिएको भन्दै उक्त कदमलाई अस्वीकार गर्ने बताएका छन्। उनीहरूले वर्तमान यथास्थितिको विकल्प अग्रगमन हुनुपर्ने र पश्चगमन स्वीकार्य नभएको स्पष्ट पारेका छन्।
संयुक्त विद्यार्थी संगठनहरूले हिंसात्मक घटनाका मृतकप्रति श्रद्धाञ्जली व्यक्त गर्दै घटनाका मुख्य योजनाकारहरू ज्ञानेन्द्र शाह, पूर्व पञ्च तथा सम्पूर्ण संलग्नहरूलाई छानबिन गरी कडा कारबाहीको माग गरेका छन्।
त्रिभुवन विश्वविद्यालयमा सरकारी हस्तक्षेपको विरोध
संयुक्त विद्यार्थी संगठनहरूले त्रिभुवन विश्वविद्यालयका उपकुलपति प्रा. डा. केशर जङ्ग बरालको राजिनामाप्रति पनि गम्भीर ध्यानाकर्षण भएको बताएका छन्। उनीहरूले सरकारले विश्वविद्यालयमा चरम राजनीतिक हस्तक्षेप गर्दै आएको आरोप लगाउँदै यस्तो हस्तक्षेप रोक्न माग गरेका छन्।
विद्यार्थी संगठनहरूले राजनीतिक भागबण्डाका कारण विश्वविद्यालय तहसनहस हुन लागेको भन्दै आगामी दिनमा यस्ता हस्तक्षेप दोहोरिए कडा प्रतिवाद गर्ने चेतावनी दिएका छन्।
उनीहरूले त्रिभुवन विश्वविद्यालयलाई राजनीतिक हस्तक्षेप र भागबण्डामुक्त बनाउन सरकारसँग जोडदार माग गरेका छन्।