सप्तरीमा विरोध, पत्रकारहरू कालो पट्टी बाँधेर प्रदर्शन

लिलाकान्त यादव,
राजविराज, १७ चैत्र ।
पत्रकार सुरेश रजकको हत्या र उनको सञ्चार गृहमा भएको आगजनी विरुद्ध सप्तरीका पत्रकारहरूले आज विरोध प्रदर्शन गरेका छन्। नेपाल पत्रकार महासंघ शाखा सप्तरीका अध्यक्ष श्रवण देवको अगुवाइमा पत्रकारहरूले कालो पट्टी बाँधेर न्यायको माग गरेका छन्।
सञ्चार स्वतन्त्रतामाथि भएको आक्रमणलाई निन्दा गर्दै पत्रकार महासंघले दोषीलाई कडा कारबाही गर्न माग गरेको छ। महासंघका अध्यक्षले भने, “पत्रकारिता क्षेत्रलाई डरभित्र राख्ने कुनै पनि प्रयास स्वीकार्य हुँदैन।“
सप्तरीका पत्रकारहरूले घटनाको उच्चस्तरीय छानबिन, दोषीको तत्काल गिरफ्तारी र सञ्चारकर्मीहरूको सुरक्षाको सुनिश्चितता गर्न सरकारसँग माग गरेका छन्।
विरोध सभामा विभिन्न सञ्चार माध्यमका पत्रकार, नागरिक समाजका प्रतिनिधि र स्थानीय बासिन्दाको उपस्थिति रहेको थियो।