जनकपुर हत्याकाण्डः प्रहरी र स्थानीयबीच झडप, दर्जनौं घाइते

ईमधेश न्यूज सम्वाददाता,
जनकपुरधाम,  १७ चैत ।
 जनकपुरधाम उपमहानगरपालिका–२३ विन्धीमा १७ वर्षीय आंशु यादव हत्याकाण्डको विरोधमा उत्रिएका स्थानीय र प्रहरीले झडप भएको छ।
स्थानीयले जनकपुरधाम–जलेश्वर सडक अवरुद्ध गरी विरोध गरेपछि प्रहरीले बल प्रयोग गर्दा स्थिति तनावग्रस्त बन्यो। दर्जनौं राउण्ड अश्रुग्यास प्रहार गरिएको छ भने एक दर्जनभन्दा बढी स्थानीय र प्रहरी घाइते भएका छन्। झडपका क्रममा लाठी प्रहारबाट एक महिलाको टाउको फुटेको छ।

१५ दिनअघि होलीको दिन यादवको छुरा प्रहार गरी हत्या गरिएको थियो। एक आरोपी पक्राउ परे पनि अन्य ६ जना अझै फरार छन्, जसलाई प्रहरीले पक्राउ गर्न आलटाल गरेको भन्दै स्थानीय आक्रोशित छन्।
स्थानीयले टायर बालेर चक्काजाम गर्दै निष्पक्ष छानबिन र हत्याराको गिरफ्तारीको माग गरेका छन्। घटनास्थलमा नेपाल प्रहरी र सशस्त्र प्रहरीको बाक्लो उपस्थिति छ, स्थिति अझै तनावग्रस्त रहेको छ।