महासंघको चेतावनी पत्रकारलाई सामूहिक बदनाम गर्नेलाई कानुनी कारबाही गर्ने 

मधेश न्यूज सम्वाददाता,
रौतहट, १३ चैत ।
 नेपाल पत्रकार महासंघ रौतहट शाखाले पत्रकारहरूलाई सामूहिक रूपमा बदनाम गराउने जो–कोहीमाथि कानुनी कारबाही गर्ने चेतावनी दिएको छ।
महासंघका सचिव गौतम श्रेष्ठले बुधबार जारी गरेको प्रेस विज्ञप्तिमा, सामाजिक सञ्जालमा रौतहटका सञ्चारकर्मीहरूमाथि अपशब्द प्रयोग गरी तथ्यहीन आरोप लगाउने कार्यप्रति ध्यानाकर्षण भएको उल्लेख छ। विज्ञप्तिमा व्यक्तिगत रिसइवीका कारण सम्पूर्ण सञ्चारकर्मीलाई बदनाम गर्नु निन्दनीय रहेको र यसरी गलत सूचना फैलाउनेहरूमाथि कानुनी कारबाही गरिने चेतावनी दिइएको छ।
महासंघले सामाजिक सञ्जालमा बिना प्रमाण पत्रकारहरूलाई आरोप लगाउने तथा गालीगलौज गर्ने घटनाहरूलाई सम्बोधन गर्न सम्बन्धित निकायको ध्यानाकर्षण गराएको छ। साथै, महासंघले सञ्चारकर्मीहरूलाई पत्रकार आचारसंहिताभित्र रही जिम्मेवारीपूर्वक कार्य गर्न आग्रह गरेको छ।
बैठकले सहसचिव दिनेश यादव संगमलाई सूचना अधिकारीको रूपमा नियुक्त गरेको महासंघका अध्यक्ष सन्जय कुमार कार्कीले जानकारी गराएका छन्।