छिन्नमस्ता गाउँपालिकामा सौर्य ऊर्जा र हाइब्रिड सिंचाई आयोजना निर्माण हुने

आर.एन.मेहता,
राजविराज, १२ चैत्र ।
 छिन्नमस्ता गाउँपालिकामा ६ करोड ५० लाख रुपैयाँ लागतमा अत्याधुनिक सौर्य ऊर्जा र हाइब्रिड कृषि सिंचाई आयोजना निर्माण हुने भएको छ। गाउँपालिका र दातृ निकायको संयुक्त लगानीमा सञ्चालन हुने यो परियोजनामा गाउँपालिकाले २० प्रतिशत तथा दातृ निकायले ८० प्रतिशत लगानी गर्नेछ।
गाउँपालिका अध्यक्ष विद्यानन्द चौधरीका अनुसार छिन्नमस्ता–५, लोखरम फुलकाही चौरी क्षेत्र र वरपरको ४००–६०० विगाहा जमिनमा यो परियोजना कार्यान्वयन गरिनेछ। सिंचाई सुविधा अभावका कारण उत्पादनमा सीमित किसानहरूको आर्थिक अवस्थामा परिवर्तन ल्याउने लक्ष्यसहित परियोजना अघि बढाइएको छ।
परियोजनाका विशेषताहरूःमा सौर्य ऊर्जा र हाइब्रिड मोडल सिंचाई प्रणाली मार्फत दिनभर सौर्य ऊर्जा र राति विद्युत ग्रिडमार्फत पानी प्रवाह, करिब ८०० विगाहा जमिनमा नियमित सिंचाई, जसले किसानको आर्थिक स्तर उकास्ने, ५, ६, ३ नं. वडाका कृषकलाई निःशुल्क सिंचाई सुविधा र स्थानीय रोजगारी सिर्जना गर्दै आधुनिक कृषिको प्रवद्र्धन गर्नेछ ।
गाउँपालिकाले आवश्यक प्राविधिक कर्मचारीको व्यवस्थापन गर्ने र दातृ निकायले चार चरणको अध्ययनपछि ठेक्का प्रक्रिया अघि बढाउने जनाएको छ। यस परियोजनाले छिन्नमस्तालाई हरियाली, उत्पादक र आत्मनिर्भर कृषि क्षेत्रका रूपमा विकास गर्ने अपेक्षा गरिएको छ।