नेकपा (बहुमत)द्वारा सम्पत्ति छानबिनको आन्दोलन घोषणा

लिलाकान्त यादव,
काठमाडौं, १२ चैत्र ।
 राष्ट्रप्रमुख, प्रधानमन्त्री तथा उच्च पदस्थ व्यक्तिहरुको सम्पत्ति छानबिनको माग गर्दै नेकपा (बहुमत)ले आन्दोलनको घोषणा गरेको छ। मंगलबार काठमाडौंमा आयोजित पत्रकार सम्मेलनमा ३ नम्बर ब्यूरो इन्चार्ज उदयबहादुर चलाउने ‘दिपक’ले माग पूरा नभए कडा आन्दोलन गर्ने चेतावनी दिएका छन्।
उनले भ्रष्टाचारलाई मुख्य दुश्मन भन्दै, उच्च पदस्थ व्यक्तिहरुकै संलग्नता रहेको आरोप लगाए। चैत २४ देखि वैशाख ९ गतेसम्म माईतीघर मण्डलामा धर्ना दिने घोषणा गर्दै, राज्यकोष दुरुपयोग भए सम्पत्ति राष्ट्रियकरण गर्नुपर्ने माग राखे।
चलाउनेले ऊर्जा मन्त्री दिपक खड्काको चलखेलकै कारण कुलमान घिसिङ बर्खास्त भएको आरोपसमेत लगाए। पत्रकार सम्मेलनमा पार्टीका केन्द्रीय सदस्य कुमाल सिलवालसहित विभिन्न नेताहरूको उपस्थिति थियो।