जसपा नेपालद्वारा अध्यक्ष यादवविरुद्ध लगाइएका आरोपको खण्डन

लिलाकान्त यादव,
काठमाडौं, ११  चैत ।
 जनता समाजवादी पार्टी, नेपाल (जसपा) ले अध्यक्ष उपेन्द्र यादवविरुद्ध सामाजिक सञ्जालमार्फत खगेन्द्र सुनारद्वारा लगाइएको आरोप पूर्ण रूपमा भ्रामक, निराधार, घृणित, अमर्यादित र आपराधिक प्रवृत्तिको भएको जनाएको छ।
पार्टीले आज विज्ञप्ति जारी गर्दै सामाजिक सद्भाव बिगार्ने, चरित्र हत्या गर्ने, समाजमा घृणा फैलाउने नियोजित प्रयासस्वरूप यी आरोपहरू प्रचार गरिएको दाबी गरेको छ। जसपाले यस्ता मनगढन्ते आरोपहरूको कडा शब्दमा खण्डन गर्दै सत्यता प्रमाणित गर्न चुनौती दिएको छ।
जसपा नेपालले मधेशी, दलित, मुस्लिम, आदिवासी जनजाति, महिला, उत्पीडित तथा सीमान्तकृत वर्गका अधिकारका लागि संघर्षरत रहेको बताउँदै जातीय विभेदको अन्त्य र समानताको पक्षमा पार्टी सधैं प्रतिबद्ध रहने स्पष्ट पारेको छ।