सप्तरीमा दुई केन्द्राध्यक्षसहित २६ जनालाई कारबाही

लिलाकान्त यादव,
राजविराज, ०७ चैत ।
सप्तरीमा बिहिवार देखि सुरु भएको माध्यमिक शिक्षा परीक्षा (एसईई) को पहिलो दिन शान्तिपूर्ण रूपमा सम्पन्न भएको छ। यद्यपि, केही केन्द्रमा मर्यादाविपरीत कार्य गरेको पाइएपछि दुई केन्द्राध्यक्षसहित २६ जनालाई कारबाही गरिएको छ।
जिल्ला परीक्षा सुरक्षा समितिका अध्यक्ष तथा प्रमुख जिल्ला अधिकारी भोला दाहालको नेतृत्वमा खटिएको अनुगमन टोलीले विष्णुपुर र हनुमाननगरका परीक्षा केन्द्रहरूमा अनियमितताहरू पत्ता लगाएका थिए। विष्णुपुरको जनता माध्यमिक विद्यालय इटहरी विष्णुपुरमा कोठा नम्बर १, ७, र ८ मा एउटै विद्यालयका परीक्षार्थी राखेर मर्यादाविपरीत कार्य गरेको पाइएको थियो। त्यहाँका केन्द्राध्यक्ष, सहायक केन्द्राध्यक्ष र कोठा निरीक्षकलाई कारबाही गरिएको छ।
हनुमाननगरको महावीर माध्यमिक विद्यालयमा प्रश्नपत्रका उत्तरका चिटहरू बरामद भएपछि त्यहाँका केन्द्राध्यक्ष र अन्य अधिकारीहरूलाई पनि कारबाही गरिएको छ।
पहिलो दिनको एसईई परीक्षा अनिवार्य अंग्रेजी विषयमा सम्पन्न भएको हो र ३७ वटा परीक्षा केन्द्रमा यो परीक्षा सञ्चालन भएको छ। यस वर्ष सप्तरीबाट ८,७१५ विद्यार्थी एसईई परीक्षामा सहभागी भएका छन्। परीक्षा सञ्चालनको क्रममा सुरक्षाका लागि ५५५ जना सुरक्षाकर्मी र १६२ जना कार्यालय सहयोगी खटिएका छन्।
प्रमुख शशि यादवका अनुसार, सुरक्षाका कारण पहिलो दिन कुनै पनि अमर्यादित गतिविधि भएन र परीक्षालाई निष्पक्ष र मर्यादित बनाउन ध्यान दिइएको छ।