रजिस्टार ठाकुर पुनः कार्यभारमा, मधेश कृषि विश्वविद्यालयमा उत्साह

मधेश न्यूज सम्वाददाता,
जनकपुरधाम ०७ चैत्र ।
 सर्वोच्च अदालतको अन्तरिम आदेशपछि मधेश कृषि विश्वविद्यालयका रजिस्टार श्रीभगवान ठाकुर पुनः कार्यभारमा फर्किएका छन्। नौ महिनादेखि अवरुद्ध रहेको पठनपाठन र प्रशासनिक कार्य पुनः सुचारु हुने भएपछि शिक्षक, कर्मचारी र विद्यार्थीहरूमा उत्साह छाएको छ।
रजिस्टार ठाकुरले विश्वविद्यालयको शैक्षिक तथा प्रशासनिक गतिविधि व्यवस्थित गर्ने, अवरुद्ध परीक्षाहरू सञ्चालन गर्ने र शिक्षक–कर्मचारीको तलबभत्ता तुरुन्त उपलब्ध गराउने प्रतिबद्धता जनाएका छन्। उनका अनुसार कृषि क्षेत्रको विकासबिना मधेशको समृद्धि सम्भव छैन र यसलाई प्राथमिकताका साथ अघि बढाइनेछ।
विश्वविद्यालय परिसरमा आयोजित कार्यक्रममा शिक्षक तथा विद्यार्थीहरूले ठाकुरलाई फूलमाला र सम्मानसहित स्वागत गरे। विद्यार्थीहरूले चाँडै परीक्षाहरू सञ्चालन गर्न माग गरेका छन् भने शिक्षक–कर्मचारीहरूले तलबभत्ता रोक्का फुकुवा गर्न जोडदार आग्रह गरेका छन्।
रजिस्टार ठाकुरले सम्पूर्ण सरोकारवालासँग सहकार्य गर्दै विश्वविद्यालयलाई गतिशील बनाउने प्रतिज्ञा व्यक्त गरे। उनका अनुसार न्याय अझै जीवित छ र यो निर्णयले विश्वविद्यालयमा सुशासन पुनः स्थापित हुने विश्वास व्यक्त गरेका छन्।