नेकपा (बहुमत) द्वारा ‘भ्रष्टाचार विरोधी दस्ता’ घोषणा, सशक्त संघर्षको तयारी

मधेश न्यूज सम्वाददाता,
काठमाडौं, ०७ चैत्र ।
 नेकपा (बहुमत) काठमाडौं जिल्ला समितिले भ्रष्टाचार, वित्तीय शोषण, कालाबजारी, मानव बेचबिखन, र सार्वजनिक सम्पत्तिको दोहनविरुद्ध सशक्त संघर्ष गर्न ‘भ्रष्टाचार विरोधी दस्ता’ घोषणा गरेको छ।
बिहीबार राजधानीको संवाद डबलीमा आयोजित पत्रकार सम्मेलनमा नेकपा (बहुमत) काठमाडौं जिल्ला इन्चार्ज सागर लिम्बु ले वर्तमान सरकार नै भ्रष्टाचार, कमिसनखोरी, र बेथितिको संरक्षक बनेको आरोप लगाए। उनले भने, “सरकार जनताका समस्याहरू समाधान गर्ने भन्दा उल्टै बेथितिलाई संरक्षण गर्दैछ, त्यसैले अब संघर्ष गर्नैपर्छ।“
नेकपा (बहुमत) ले देशभर व्याप्त अनियमितता, आर्थिक शोषण, मिटरब्याज, प्राकृतिक स्रोतसाधन दोहन, र शिक्षा तथा स्वास्थ्य क्षेत्रमा भइरहेको व्यावसायीकरणविरुद्ध अभियान सञ्चालन गर्ने घोषणा गरेको छ।
१. भ्रष्टाचार र वित्तीय शोषणविरुद्ध सशक्त आन्दोलन
नेकपा (बहुमत) ले सार्वजनिक सम्पत्ति निजीकरण गर्ने, अनियन्त्रित बैंकिङ प्रणालीमार्फत गरिब जनतालाई लुट्ने, तथा अनियमित सरकारी ठेक्कापट्टाविरुद्ध जनस्तरबाटै प्रतिरोध गर्ने बताएको छ।
२. भूमिसम्बन्धी अन्यायविरुद्ध संघर्ष
जमिन हडप्ने, कालोबजारी गर्ने, र अवैध रूपमा सार्वजनिक जग्गा निजीकरण गर्ने प्रवृत्तिविरुद्ध पार्टीले जनतासँग मिलेर आन्दोलन गर्ने जनाएको छ।
३. शिक्षा र स्वास्थ्य क्षेत्रमा सुधारका लागि दबाब
नेकपा (बहुमत) ले निजी विद्यालय र अस्पतालहरूमा अत्यधिक शुल्क असुली बन्द गराउन तथा सरकारी सेवा प्रभावकारी बनाउन पहल गर्ने जनाएको छ।
४. मानव बेचबिखन र वैदेशिक रोजगारमा हुने ठगीविरुद्ध कारबाही
अवैध रूपमा कामदार विदेश पठाउने मेनपावर कम्पनी, कन्सल्टेन्सीहरू, तथा मानव तस्करीमा संलग्न गिरोहहरूलाई कानूनी कारबाहीको दायरामा ल्याउन अभियान सञ्चालन गरिने बताइएको छ।
५. मिटरब्याज तथा लघुवित्तको शोषणविरुद्ध कडा कदम
लघुवित्त, सहकारी र बैंकहरूले गरिब तथा निम्नवर्गीय नागरिकलाई उच्च ब्याजदरमा ऋण दिएर शोषण गर्ने प्रवृत्तिविरुद्ध सशक्त आन्दोलन गर्ने नेकपा (बहुमत) ले घोषणा गरेको छ।
कार्यक्रममा भक्तपुर जिल्ला इन्चार्ज प्रतिमा बजगाईं, काठमाडौं जिल्ला संयोजक रामहरी पोखरेल, तथा अखिल (क्रान्तिकारी) बागमती प्रदेश संयोजक मिम ऐडी लगायतका नेताहरू उपस्थित थिए।
नेकपा (बहुमत) ले भ्रष्टाचार, कालाबजारी, आर्थिक शोषण, र अन्यायका विरुद्ध न्यायका पक्षधर नागरिकलाई संगठित गरी आन्दोलनलाई थप सशक्त बनाउने बताएको छ। दस्ताको पहिलो चरणको अभियान अन्तर्गत भ्रष्टाचार तथा दलालीविरुद्ध जनचेतनामूलक कार्यक्रम र कानूनी कारबाहीको पहल गरिने जनाइएको छ।
यस घोषणासँगै नेकपा (बहुमत) ले आर्थिक अनियमितता र बेथितिविरुद्ध कडा संघर्षको संकेत दिएको छ।