सप्तरीमा लागुऔषधसहित दुई जना पक्राउ

लिलाकान्त यादव,
राजविराज ०७ चैत्र ।
 सप्तरीको सप्तकोशी नगरपालिका–१, शान्ति नगरबाट लागुऔषधसहित दुई जनालाई प्रहरीले पक्राउ गरेको छ।
प्रहरीका अनुसार पक्राउ पर्नेमा सुनसरी भोक्राहा नरसिंह गाउँपालिका–६ का २६ वर्षीय ममतलज मिया र सुनसरी देवांगंज गाउँपालिका–१ की २५ वर्षीया तिलो कुमारी यादव रहेका छन्। उनीहरू जय प्रकाश गुप्ताको घरमा डेरा लिएर बसेको अवस्थामा पक्राउ परेका हुन्।
प्रहरीले उनीहरूको कोठाबाट नाइट्राजेपाम ट्याब्लेट (१० मिलिग्राम) १४ पत्ता (१४० चक्की) र कोडिन फस्फेट तथा ट्राइप्रोलिडिन हाइड्रोक्लोराइड सिरप १००० एमएलको ४ बोतल बरामद गरेको छ।
गोप्य सूचनाको आधारमा प्रहरी चौकी रत्तपेरुबारीबाट खटिएको प्रहरी टोलीले उनीहरूलाई नियन्त्रणमा लिएको हो। पक्राउ परेका दुबै जनामाथि थप अनुसन्धान भइरहेको प्रहरीले जनाएको छ।