मजदुर संगठनहरूको हानलाई ध्यानाकर्षण पत्र, देशभर आन्दोलनको चेतावनी

लिलाकान्त यादव,
राजविराज, ०४ चैत्र ।
 प्रमुख राजनीतिक दल निकट मजदुर संगठनहरूले होटल एसोसिएसन नेपाल (हान) लाई ६ बुँदे माग पूरा गर्न ध्यानाकर्षण पत्र बुझाएका छन्।
आईतबार काठमाडौंको गैरिधारामा मजदुर संघका प्रतिनिधिहरूले हानका सिइओ टेकेन्द्र बहादुर महतलाई पत्र बुझाउँदै चैत २५ सम्म अभियानात्मक कार्यक्रम सार्वजनिक गरेका छन्।
मजदुर नेताहरूले सेवाशुल्क पुनःस्थापना, नियमित श्रमिक व्यवस्थापन, श्रमिक अधिकारको कानूनी ग्यारेन्टी लगायतका माग सम्बोधन नभए सशक्त आन्दोलन गर्ने चेतावनी दिएका छन्।
चैत ४ बाट देशव्यापी मजदुर जागरण अभियान, उच्च सरकारी अधिकारीहरूलाई ज्ञापन पत्र बुझाउने, र चैत २५ मा विशाल मजदुर सभा आयोजना गर्ने कार्यक्रम घोषणा गरिएको छ।
यदि माग पूरा नभए थप सशक्त आन्दोलन गर्ने मजदुर संगठनहरूको चेतावनी छ।