सांसद भगवती चौधरीः संसद अनावश्यक विवादमा अल्झियो, जनताको समस्या गौण

लिलाकान्त यादव,
काठमाडौं, २८ फाल्गुन ।
 नेकपा एमालेकी सांसद भगवती चौधरीले संघीय संसद अनावश्यक आरोप–प्रत्यारोपमा अल्झिएको भन्दै जनताको वास्तविक समस्या ओझेलमा परेको गुनासो गरेकी छिन्।
प्रतिनिधि सभामा विशेष समय लिएर बोल्दै पूर्वमन्त्री समेत रहेकी चौधरीले संसदलाई विकास र नीतिगत छलफलको थलो बनाउनुपर्नेमा व्यक्तिगत आक्षेप र राजनीतिक द्वन्द्वमा अल्झाइएको आरोप लगाइन्।
उहाँले राख्नुभएको मुख्य बुँदाहरुमा बेरोजगारी, युवा पलायन, महिला हिंसा जस्ता गम्भीर मुद्दाहरू संसदमा प्रवेश नै पाउँदैनन्।
संसद आरोप–प्रत्यारोपको थलो बन्नु दुःखद – साझा राष्ट्रिय एजेन्डामा छलफल आवश्यक छ ।
 नेपाललाई विज्ञान, प्रविधि र एआईतर्फ लैजान युवालाई अवसर दिनुपर्छ।
 महिला नेतृत्व कानुनी रूपमा स्थापित भए पनि व्यवहारमा कार्यान्वयन कमजोर छ ।
वर्तमान सरकारका नेताहरूलाई हिटलर भन्ने कुरा अमर्यादित – आलोचना संसदीय मर्यादाभित्र हुनुपर्छ।
 राजसंस्थाको पक्षमा भइरहेको आन्दोलनप्रति असहमति – लोकतान्त्रिक बाटोबाट मात्रै परिवर्तन सम्भव हुन्छ ।
सांसद चौधरीले नेपाललाई समृद्ध बनाउन राजनीतिक दलहरू मिलेर साझा रणनीति बनाउने बेला आएको बताइन्।
‘हिंसामुक्त समाज, बेरोजगारीको अन्त्य, युवा पलायनको समस्या समाधान गर्न सबै दलहरू मिलेर नीति बनाउन आवश्यक छ,’ उनले भनिन्।
संविधान र लोकतान्त्रिक विधिमार्फत अघि बढ्नुपर्नेमा उनले जोड दिइन्।