मबिब क्याम्पसका निमित क्याम्पस प्रमुखमा रामअशिष यादव नियुक्त

लिला कान्त यादव राजबिराज – त्रिभुवन विश्वविद्यालयले श्री महेन्द्र बिन्देश्वरी बहुमुखी (मबिब) क्याम्पसका निमित क्याम्पस प्रमुखमा उपप्राध्यापक रामअशिष यादवलाई नियुक्त गरेको छ। तत्कालीन क्याम्पस प्रमुख राजिवकुमार मिश्रको कार्यकाल माघ २८ गते समाप्त भएसँगै क्याम्पस प्रमुखको पद रिक्त रहेको थियो। विश्वविद्यालयले यादवलाई उक्त पदको जिम्मेवारी सुम्पिएपछि उनले बुधबार पदभार ग्रहण गरेका छन्। पदभार ग्रहणपछि यादवले क्याम्पसको शैक्षिक वातावरण सुधार गर्दै पठनपाठनलाई नियमित गराउने प्रतिबद्धता व्यक्त गरेका छन्। विद्यार्थीको शैक्षिक गुणस्तर अभिवृद्धि गर्न तथा क्याम्पस प्रशासनलाई प्रभावकारी बनाउन आवश्यक पहल गरिने उनले बताएका छन्। यस नियुक्तिसँगै मबिब क्याम्पसमा शैक्षिक तथा प्रशासनिक व्यवस्थापनलाई प्रभावकारी बनाउन अपेक्षा गरिएको छ।