सेवाशुल्क पुनः प्राप्तिको माग गर्दै होटल मजदुरहरूको आन्दोलन

ईमधेश न्यूज सम्वाददाता,
काठमाडौं,२१ फाल्गुन ।
 सेवाशुल्क पुनः प्राप्तिको माग गर्दै विभिन्न तारे होटल तथा रेष्टुराँका मजदुरहरू आन्दोलनमा उत्रिएका छन्। बुधबार राजधानीका सोल्टी, चन्द्रागिरी हिल्स, पार्क भिलेज रिसोर्ट लगायतका होटलहरूमा प्रदर्शन गर्दै मजदुरहरूले सर्वोच्च अदालतको सेवाशुल्क खारेजीसम्बन्धी निर्णय अन्यायपूर्ण भएको बताएका छन्।
अखिल नेपाल होटल, क्यासिनो तथा रेष्टुराँ मजदुर संघका अध्यक्ष कुमार पन्त ले सेवाशुल्क पुनः प्राप्ति नहुन्जेल संघर्ष जारी रहने बताए।
वरिष्ठ उपाध्यक्ष मिलन मल्ल ले सर्वोच्चको फैसला श्रमिक विरोधी भएको र यसले दक्ष श्रमिक विदेशिन बाध्य बनाएको आरोप लगाए।
महासचिव रामकुमार खड्का ले सेवाशुल्क कानूनीरूपमा लागू हुनुका साथै स्थायी श्रमिक नियुक्ति व्यवस्था आवश्यक रहेको बताए।
उपाध्यक्ष सुसिल राजभण्डारी ले पर्यटन क्षेत्रमा कार्यरत मजदुरलाई न्यूनतम बेतनको ग्यारेन्टी नभए देशबाट दक्ष जनशक्ति पलायन हुने चेतावनी दिए।
सोल्टी होटल इकाईका अध्यक्ष सुमन महर्जन ले देशभर मजदुरहरू अन्यायमा परेको भन्दै संघर्षलाई चर्काउने बताए।
मजदुर जागरण अभियानका मुख्य कारणहरूमा सेवाशुल्क कानूनीरूपमा लागू गराउनु पर्ने, स्थायी श्रमिक नियुक्तिको व्यवस्था गर्न, पर्यटन क्षेत्रमा न्यूनतम बेतन ग्यारेन्टी गराउन र सामाजिक सुरक्षा कोषमा सबै मजदुरलाई आबद्ध गराउने जस्ता कारणहरु मजदुर जागरण अभियानका मुख्य कारणहरु हुन ।
फागुन १८ गतेदेखि होटल हिमालय र होटल मल्लबाट सुरु भएको मजदुर जागरण अभियान क्रमशः विभिन्न होटलहरूमा विस्तार भइरहेको छ। अध्यक्ष पन्तले चैत १ गते माइतीघर मण्डलामा धर्ना दिने कार्यक्रम तय भएको जानकारी दिँदै सम्पूर्ण मजदुरहरूलाई सक्रिय सहभागिताका लागि आह्वान गरे।