सरकार स्वार्थ समूहको पक्षमा ः माओवादी उपमहासचिव बस्नेत

लिलाकान्त यादव,
काठमाडौं, १८ फाल्गुन ।
 नेकपा (माओवादी केन्द्र) का उपमहासचिव शक्तिबहादुर बस्नेत ले वर्तमान सरकार जनताको आवश्यकतालाई उपेक्षा गर्दै सीमित स्वार्थ समूहको पक्षमा काम गरिरहेको आरोप लगाएका छन्।
प्रेस सेन्टर नेपाल एशोसिएट प्रदेशको दोस्रो अधिवेशनमा बोल्दै बस्नेतले सरकारले राष्ट्रसेवक कर्मचारीमाथि अनावश्यक हस्तक्षेप गरेको दाबी गर्दै कुलमान घिसिङलाई पटक–पटक स्पष्टिकरण माग्नु अनुचित रहेको बताए।
उनले नेपाली कांग्रेस र नेकपा (एमाले) संविधानको प्रगतिशील चरित्रलाई परास्त गर्न संशोधनको कुरा उठाइरहेको आरोप लगाए। उनले व्यवस्था मात्र बदलिनु पर्याप्त नभएको, जनताको अवस्था सुधार्न सरकार असफल भइरहेको टिप्पणी गरे।
पूर्वगृहमन्त्री समेत रहेका बस्नेतले माओवादीको पहलबाट आएको परिवर्तनको मूल मर्मअनुसार सरकार अघि नबढेको बताए। उनले सरकार आफैंले ल्याएको अध्यादेशले नैतिक संकट सिर्जना गरेको उल्लेख गर्दै रातारात अध्यादेश ल्याउनु गलत भएको टिप्पणी गरे।
उनले माओवादीले झापा–कञ्चनपुरसम्म हुलाकी राजमार्ग अभियान सञ्चालन गरिरहेको जानकारी गराउँदै प्रचण्ड नेतृत्वको सुशासन अभियानलाई रोक्ने प्रयासविरुद्ध जनस्तरबाट खबरदारी भइरहेको बताए।