ई-मधेश न्युज
डाक्नेश्वरी नगरपालिका-४, कुसहा, सप्तरीमा बैलगाडी रेस सम्पन्न
उमेश कुमर यादव, डाक्नेश्वरी नगरपालिका-४, कुसहामा हरेक वर्ष श्री श्री १०८ बाबा कुशेश्वरनाथ महाशिवरात्रि मेला अन्तर्गत आयोजना हुँदै आएको बैलगाडी रेस प्रतियोगिता यस वर्ष पनि उत्साहका साथ सम्पन्न भएको छ। प्रतियोगितामा बोदेबर्साइन नगरपालिकाका संजय कुमार कौरिया प्रथम स्थान हासिल गर्न सफल भए। उनले ४ मिनेट ५७ सेकेन्ड मा दौड पूरा गर्दै १ थान बाल्टिन, १ जोडा घुँघुर र नगद रु ३१०० पुरस्कार प्राप्त गरे। उनलाई वडा अध्यक्ष देवेन्द्र प्रसाद यादव द्वारा पुरस्कार प्रदान गरियो। दोस्रो स्थानमा बोदेबर्साइन नगरपालिका, मधुवनका प्रमोद यादव रहे, जसले ५ मिनेट ५४ सेकेन्ड मा दौड पूरा गरे। उनलाई मेला अध्यक्ष श्रवण कुमार राय द्वारा सम्मान गरियो। तेस्रो स्थानमा हटैलका शुशिलाल यादव रहे, जसले ५ मिनेट ५५ सेकेन्ड मा दूरी पूरा गरे। उनलाई बैलगाडी कमिटी अध्यक्ष रञ्जित कुमार राय द्वारा पुरस्कार प्रदान गरियो। यस प्रतियोगिताले स्थानीय परम्परा तथा संस्कृति संरक्षणमा महत्वपूर्ण योगदान पुर्याउँदै आएको छ। हरेक वर्ष यो प्रतियोगिता हेर्न तथा भाग लिन विभिन्न स्थानबाट सहभागीहरू आउने गर्छन्।
