राराब क्याम्पसमा कर्मचारीहरूबीच विवाद चर्किँदा कुटाकुट, ४ घाइते

ईमधेश न्यूज सम्वाददाता,
जनकपुरधाम,१२ फाल्गुन ।
 जनकपुरधामस्थित रामस्वरुप रामसागर बहुमुखी क्याम्पस (राराब) मा कर्मचारीहरूबीच विवाद चर्किँदा कुटाकुटको घटना भएको छ।
घटनाको मुख्य कारण एमबीएस (Masters of Business Studies) को परीक्षाको जिम्मेवारी कसलाई दिने भन्ने विषयमा उत्पन्न विवाद रहेको जनाइएको छ।
एमबीएस शाखाका प्रमुख अभिराम राय सिट प्लानसहित परीक्षा सम्बन्धी जानकारी दिन क्याम्पस प्रमुख बसन्त कर्णसँग भेट्न पुगेका बेला विवाद झनै चर्किएर कुटाकुटको रूप लिएको प्रत्यक्षदर्शीहरूले बताएका छन्।
क्याम्पस प्रमुख कर्णले रायलाई परीक्षाको जिम्मेवारीबाट हटाएर अरूलाई जिम्मा दिने मनसाय बनाएपछि विवाद सुरु भएको थियो।
विवादकै क्रममा प्रजातान्त्रिक समूहका महेश यादव र माओवादी समर्थित सुरेन्द्र यादवबीच हात हालाहाल भएको थियो। उनीहरूले एक–अर्कामाथि मुक्का प्रहार गर्दै गालीगलौजसमेत गरेको प्रत्यक्षदर्शीहरूले बताएका छन्।
घटनामा ४ जना घाइते भएका छन्। घाइते हुनेहरूमा सुरेन्द्रप्रसाद यादव, गोविन्द साह, रामपुकार महतो र विकेश अधिकारी रहेका छन ।
घाइतेहरूको उपचार भइरहेको जिल्ला प्रहरी कार्यालय धनुषाले जनाएको छ।
क्याम्पसमा झगडा भइरहेको बेलामा क्याम्पस प्रमुख बसन्त कर्ण भने मोटरसाइकल चढेर घर भागेका थिए।
हाल जिल्ला प्रहरी कार्यालय धनुषाले दुवै पक्षलाई छलफलका लागि बोलाइसकेको छ। घटनाको अनुसन्धान जारी रहेको छ।