निर्वाचनमा अध्यक्षलाई घात गरेको आरोप, युनियन बाराले ६ जनामाथि कारबाही सिफारिस

ईमधेश न्यूज सम्वाददाता,
कलैया,०६ फाल्गुन ।
 नेपाल पत्रकार महासंघको निर्वाचनमा आफ्नै अध्यक्षलाई घात गरेको भन्दै नेपाल प्रेस युनियन बारा शाखाले मधेश प्रदेश अध्यक्ष सत्य प्रकाश श्रेष्ठसहित ६ जनामाथि कारबाहीको सिफारिस गरेको छ।
युनियन बाराका अध्यक्ष श्यामबाबु यादवले नेपाल प्रेस युनियन केन्द्रीय अनुशासन समितिमा मंगलबार कारबाहीको लागि सिफारिस पठाएको जानकारी दिएका छन्। कारबाही सिफारिसमा परेकामा सिकेन्द्र पासवान, राकेश पाण्डेय, साजिर मन्सुर, प्रियंका दास, र उमेश दुबे रहेका छन्।
युनियन बाराले महासंघको निर्वाचनमा आफ्नै नेतृत्वलाई हराउन विपक्षीसँग मोर्चाबन्दी गरेको आरोप लगाएको छ। समाजवादी नेपालका उम्मेदवारलाई भोट माग्ने, संगठन बाहिरका विद्रोही उम्मेदवारलाई साथ दिने जस्ता गतिविधि गरेका कारण उनीहरूलाई स्पष्टिकरण सोधिएको समेत सिफारिस पत्रमा उल्लेख छ।
जिल्ला कार्यसमिति बाराले २०८१ फागुन २ गते बसेको बैठकको निर्णयअनुसार कारबाहीका लागि सिफारिस गरिएको जनाएको छ।