सार्वजनिक स्थानमा ठूलो आवाजमा बाजा तथा डिजे बजाउन रोक

लिलाकान्त यादव
राजविराज, ०५ फाल्गुन ।
 विवाह, चाडपर्व तथा अन्य सांस्कृतिक कार्यक्रमहरू आयोजना गर्ने क्रममा सार्वजनिक बाटोमा अत्यधिक ठूलो स्वरमा बाजा तथा डिजे बजाउँदा ध्वनि प्रदूषण बढेको भन्दै प्रशासनले कडा निगरानी राख्ने भएको छ।
सहायक प्रमुख जिल्ला अधिकारीको कार्यालयले एक सूचना जारी गर्दै अत्यधिक आवाजका कारण जनस्वास्थ्य, अध्ययन वातावरण तथा शान्ति सुव्यवस्थामा असर परेकाले यसलाई नियन्त्रण गर्ने निर्णय गरिएको जनाएको छ। विशेष गरी सार्वजनिक स्थलमा अनावश्यक रूपमा ठूलो आवाजमा बाजा तथा डिजे बजाउँदा स्थानीयवासी तथा विद्यार्थीहरूलाई असुविधा भइरहेको जनाउँदै प्रशासनले सबैलाई संयमित भएर सांस्कृतिक गतिविधि सञ्चालन गर्न अनुरोध गरेको छ।
प्रशासनको सूचनामा घर तथा विवाह स्थलमा मात्र सीमित रहेर अन्य व्यक्तिहरूलाई असर नपर्ने गरी कार्यक्रमहरू सम्पन्न गर्न अपिल गरिएको छ। यस निर्देशिका उल्लङ्घन गर्नेहरूमाथि आवश्यक कानुनी कारबाही गरिने चेतावनी पनि दिइएको छ।
स्थानीय प्रशासनले आम नागरिकलाई शान्ति सुव्यवस्था कायम राख्न सहयोग गर्न आग्रह गरेको छ।