सप्तरीको खडक नपा–मा १०० जनाको जसपा नेपाल प्रवेश

उमेश कुमार यादव,
राजविराज, ०२ फाल्गुन ।
 सप्तरीको खडक नगरपालिकामा विभिन्न दल परित्याग गरी १०० जना जनता समाजवादी पार्टी (जसपा) नेपालमा प्रवेश गरेका छन्।
प्रदेश सांसद माननीय अनिरुद्ध प्रसाद सिंह यादवको विशेष पहल तथा जसपा नेपालका राष्ट्रिय अध्यक्ष माननीय उपेन्द्र यादवको विशेष उपस्थितिमा उनीहरूले औपचारिक रूपमा पार्टी प्रवेश गरेका हुन्।
पार्टी प्रवेश कार्यक्रमलाई सम्बोधन गर्दै जसपा नेपालका शीर्ष नेताहरूले लोकतन्त्र, समानता र मधेशको हक–अधिकार स्थापित गर्न पार्टीले लिएको मार्गदर्शनप्रति आम जनतामा आकर्षण बढेको बताएका छन्। नवप्रवेशीहरूले जसपा नेपालको नीति, विचारधारा र समावेशी राजनीतिक धारप्रति विश्वास राखी पार्टीमा सामेल भएको बताएका छन्।
जसपा नेपालले स्थानीय तहदेखि प्रदेश र केन्द्रसम्म संगठन सुदृढीकरणलाई प्राथमिकता दिँदै नयाँ कार्यकर्ताहरूलाई जिम्मेवारी दिने योजना बनाएको छ। पार्टीका नेताहरूले नयाँ सदस्यहरूले जसपा नेपाललाई थप मजबुत बनाउने र पार्टीको संगठन विस्तारमा महत्वपूर्ण भूमिका निर्वाह गर्ने विश्वास व्यक्त गरेका छन्।
राष्ट्रिय अध्यक्ष उपेन्द्र यादवले पार्टीलाई अझ व्यवस्थित र बलियो बनाउन निरन्तर लागिरहने प्रतिबद्धता व्यक्त गर्दै नवप्रवेशी कार्यकर्ताहरूलाई संगठन निर्माण र जनतासँगको सम्बन्ध मजबुत बनाउन आह्वान गरे।
यस प्रवेशसँगै खडक नगरपालिकामा जसपा नेपालको संगठनात्मक प्रभाव थप बलियो बनेको छ भने यसले स्थानीय तहमा आगामी राजनीतिक परिदृश्यमा महत्वपूर्ण भूमिका खेल्ने विश्वास गरिएको छ।