जनता समाजवादी पार्टी, नेपालको संसदीय दलको निर्णयहरू सार्वजनिक

लिलाकान्त यादव,
काठमाडौं, २९ माघ ।
 जनता समाजवादी पार्टी (जसपा) नेपालको संसदीय दलले आज बसेको बैठकमार्फत नेपाल सरकारले जारी गरेका ६ वटा अध्यादेशहरूमध्ये “भूमि सम्बन्धी केही नेपाल ऐनलाई संशोधन गर्न बनेको अध्यादेश“ प्रति गम्भीर असहमति र विरोध जनाएको छ।
बैठकले उक्त अध्यादेशले भूमि व्यवस्थापनमा अनियमितता निम्त्याउने, वन तथा वातावरण विनाश गर्ने, आन्तरिक बसाइँसराइ र आप्रवासनलाई बढावा दिने, र भविष्यमा आन्तरिक द्वन्द्वको सम्भावना बढाउने ठहर गरेको छ। जसपा नेपालका अनुसार, चुरिया क्षेत्रमा गम्भीर असर पर्न सक्ने र तराई÷मधेश मरुभूमिकरण हुने खतरा रहेको छ।
बैठकमा यो अध्यादेश केही भ्रष्टाचारी, कमिसनखोर, विचौलिया, सरकार नजिक रहेका व्यक्तिहरू, भू–माफिया, ठूला रियल स्टेट व्यापारी तथा आवास कम्पनीहरूलाई मात्र फाइदा पुग्ने गरी ल्याइएको भन्दै गम्भीर आपत्ति जनाइएको छ।
जसपा नेपालले सरकारलाई भूमिहीन दलित, भूमिहीन सुकुम्बासी तथा गरिब वर्गको उचित व्यवस्थापन गर्न दबाब दिने निर्णय गरेको छ। साथै, अध्यादेशको पुनरावलोकन गर्न र पारित नगर्न सरकारलाई प्रेस विज्ञप्ति मार्फत आग्रह गरिएको छ।