विश्व रेडक्रस दिवस: मानवताको सेवामा समर्पित अभियान

हरेक वर्ष मे ८ का दिन विश्वभर “विश्व रेडक्रस दिवस” मनाइन्छ । मानवता, सेवा र करुणाको सन्देश बोकेको यो दिवस हेनरी ड्यूनान्टको जन्मदिनको सम्झनामा मनाउने गरिन्छ । सन् १८२८ मा स्वीट्जरल्यान्डको जेनेभामा जन्मिएका ड्यूनान्टले युद्धपीडित र घाइतेहरूको पीडा नजिकबाट देखेपछि मानव सेवाको महान् अभियान सुरु गरेका थिए । यही अभियान विस्तार हुँदै आजको क्ष्लतभचलबतष्यलब िच्भम ऋचयकक बलम च्भम ऋचभकअभलत ःयखझभलतको स्थापना भएको हो ।
रेडक्रस केवल एउटा संस्था मात्र होइन, यो मानवताको साझा भरोसा हो । युद्ध, प्राकृतिक विपत्ति, महामारी वा अन्य संकटका बेला जात, धर्म, भाषा र राजनीतिक विचारभन्दा माथि उठेर सेवा गर्नु यसको मूल उद्देश्य हो । घाइतेको उद्धारदेखि रक्तदान, राहत वितरण, स्वास्थ्य सेवा र हराएका व्यक्तिको खोजीसम्म रेडक्रसले विश्वभर महत्वपूर्ण योगदान दिँदै आएको छ ।
नेपालमा पनि नेपाल रेडक्रस सोसाइटीले सन् १९६३ देखि निरन्तर सेवा गर्दै आएको छ । भूकम्प, बाढी, पहिरो तथा महामारीका कठिन समयमा रेडक्रस स्वयंसेवकहरू अग्रपंक्तिमा देखिने गरेका छन् । रक्तसञ्चार सेवामा यसको भूमिका विशेष रूपमा प्रशंसनीय छ । २०७२ सालको विनाशकारी भूकम्पमा रेडक्रसले खेलेको भूमिका अझै स्मरणीय छ ।
रेडक्रसका सात सिद्धान्त– मानवता, निष्पक्षता, तटस्थता, स्वतन्त्रता, स्वयंसेवा, एकता र सर्वव्यापकता– आज पनि उत्तिकै सान्दर्भिक छन् । यिनै सिद्धान्तले विश्वभरका लाखौं स्वयंसेवकलाई सेवामा प्रेरित गरिरहेका छन् ।
यद्यपि पछिल्ला वर्षहरूमा आर्थिक पारदर्शिता र व्यवस्थापनबारे विभिन्न प्रश्न उठ्ने गरेका छन् । यस्तो अवस्थामा रेडक्रसजस्ता मानवीय संस्थाले आफ्नो विश्वसनीयता अझ मजबुत बनाउन पारदर्शिता, उत्तरदायित्व र निष्पक्षतालाई थप सुदृढ गर्नु आवश्यक छ ।
मानव सभ्यताले अनेक संकट भोगिरहेको वर्तमान समयमा रेडक्रसको आवश्यकता झन् बढेको छ । मानवताको पक्षमा निस्वार्थ सेवा गर्ने सम्पूर्ण स्वयंसेवक र अभियन्ताप्रति सम्मान व्यक्त गर्दै विश्व रेडक्रस दिवसले हामी सबैलाई करुणा, सहकार्य र मानव सेवाको भावनामा एकताबद्ध हुन प्रेरणा दिन्छ ।