फरवार्ड माइक्रोफाइनान्सको १३औँ वार्षिक साधारण सभा सम्पन्न

ईमधेश न्यूज सम्वाददाता,
सुनसरी, २२ बैशाख ।
 Forward Microfinance Laghubitta Bittiya Sanstha Ltd.को १३औँ वार्षिक साधारण सभा दुहवीमा सम्पन्न भएको छ । सभाको प्रमुख अतिथिका रूपमा सहभागी भगबती चौधरीले लघुवित्त कार्यक्रमले ग्रामीण महिलाको आर्थिक, सामाजिक तथा राजनीतिक सशक्तीकरणमा सकारात्मक परिवर्तन ल्याएको बताउनुभयो ।
उहाँले ऋण मिनाहा हुने भ्रममा नपर्न सदस्यहरूलाई सचेत गराउँदै कर्जालाई उत्पादनमूलक क्षेत्रमा लगानी गर्न आग्रह गर्नुभयो । लघुवित्त क्षेत्रको दिगोपनाका लागि सञ्चालक, कर्मचारी र सेवाग्राही सबै पक्ष इमानदार हुनुपर्ने उहाँको भनाइ थियो ।
कार्यक्रममा गढी गाउँपालिकाका प्रमुख आशनारायण चौधरीले विपन्न परिवारको आर्थिक उन्नतिमा संस्थाले अझ ठूलो भूमिका खेल्न सक्ने धारणा राख्नुभयो । नवनियुक्त प्रमुख कार्यकारी अधिकृत कृष्णप्रसाद भट्टराईले संस्थाको सबलताका लागि प्रतिबद्धता जनाउनुभयो ।
सभाले आर्थिक वर्ष २०८१/८२ को वार्षिक प्रतिवेदन, लेखापरीक्षकको प्रतिवेदन तथा वित्तीय विवरणहरू पारित गरेको छ । साथै, संस्थापक र सर्वसाधारण समूहबाट सञ्चालकहरूको निर्वाचन सम्पन्न गर्दै नयाँ नेतृत्व चयन गरिएको छ ।
विशेष प्रस्तावअन्तर्गत शेयर संरचना ७०:३० बाट ६०:४० मा परिवर्तन गर्ने, पुँजीवृद्धि योजना अघि बढाउने तथा आवश्यक संशोधन गर्ने निर्णय पनि पारित भएको छ । संस्थाले हाल ४० जिल्लामा २.८४ लाखभन्दा बढी परिवारलाई सेवा पुर्‍याउँदै आएको जनाएको छ ।