विश्व प्रेस स्वतन्त्रता दिवसमा सिन्धुलीमा प्रभातफेरी र कोणसभा

ईमधेश न्यूज सम्वाददाता,
सिन्धुली, २१ बैशाख ।
 विश्व प्रेस स्वतन्त्रता दिवस का अवसरमा नेपाल पत्रकार महासंघ सिन्धुली शाखाले प्रभातफेरी र कोणसभाको आयोजना गरेको छ । सदरमुकाम सिन्धुलीमाडीमा आयोजित कार्यक्रममा स्थानीय पत्रकार तथा सरोकारवालाको उल्लेख्य सहभागिता रहेको थियो ।
महासंघको कार्यालयबाट सुरु भएको प्रभातफेरी लोकतान्त्रिक चौकमा पुगेर कोणसभामा परिणत भएको थियो । कार्यक्रममा वक्ताहरूले वर्तमान सरकारका केही नीतिका कारण प्रेस स्वतन्त्रतामाथि हस्तक्षेप बढ्न थालेको भन्दै चिन्ता व्यक्त गरेका छन् ।
कार्यक्रममा महासंघका पूर्व अध्यक्ष शंकर सौगातले निजी सञ्चारमाध्यमलाई सरकारी विज्ञापन बन्द गर्ने नीति गलत भएको उल्लेख गर्दै निर्णय फिर्ता लिन सरकारसँग माग गरे । त्यस्तै, जिल्ला अध्यक्ष बाबुराम देवकोटाले उक्त नीतिको विरोधमा चरणबद्ध आन्दोलन जारी रहेको जानकारी दिँदै प्रेस तथा अभिव्यक्ति स्वतन्त्रताको रक्षा गर्न सरकारलाई आग्रह गरे ।
कार्यक्रममा सहभागीहरूले पत्रकारमाथि हुने आक्रमण, दण्डहीनता, सञ्चारमाध्यमको कमजोर आर्थिक अवस्था तथा पत्रकारको पेशागत र भौतिक सुरक्षामा बढ्दो चुनौतीबारे पनि ध्यानाकर्षण गराएका छन् । साथै, संविधानले प्रत्याभूत गरेको प्रेस स्वतन्त्रताको रक्षा गर्न सबै पक्ष एकजुट हुनुपर्नेमा जोड दिइएको थियो ।