लागुऔषधसहित दुई मोटरसाइकलसहित चार जना पक्राउ

लिलाकान्त यादव,
राजविराज, १६ चैत ।
 सप्तरी प्रहरीले लागुऔषधसहित चार जनालाई पक्राउ गरेको छ। पक्राउ परेकाहरूबाट दुईवटा मोटरसाइकलसमेत बरामद गरिएको प्रहरीले जनाएको छ।
जिल्लाको अग्निसाइर कृष्णासावरण गाउँपालिका–१ घोघिदाहास्थित पूर्व–पश्चिम राजमार्गमा लागुऔषध बिक्री–वितरण भइरहेको भन्ने सूचनाका आधारमा इलाका प्रहरी कार्यालय महुलीबाट खटिएको टोलीले चेकजाँचका क्रममा उनीहरूलाई नियन्त्रणमा लिएको हो।
प्रहरीका अनुसार स ६ प ९०३६ नम्बरको मोटरसाइकल रोकेर जाँच गर्दा चालक राजविराज नगरपालिका–२ पररियाका ३६ वर्षीय मो. मुस्ताकको साथबाट २३ पिस लागुऔषध बरामद गरिएको छ। बरामद सामग्रीमा डाइजेपाम ७ पिस, आईपीपीएल ७ पिस र फेनरगन ९ पिस रहेका छन्।
यसैगरी उक्त लागुऔषध खरिद गर्ने आरोपमा सप्तकोशी नगरपालिका–८ ओद्राहाका २३ वर्षीय कृष्णकुमार खंग, २५ वर्षीय राजकुमार बहदार र रुपनी गाउँपालिका–६ का सितल मगरलाई समेत नियन्त्रणमा लिइएको छ। उनीहरूले प्रयोग गरेको को २९ प ६१०६ नम्बरको मोटरसाइकल पनि प्रहरीले बरामद गरेको छ।
पक्राउ परेकाहरूलाई इलाका प्रहरी कार्यालय कञ्चनपुरमा राखी थप अनुसन्धान भइरहेको छ। सप्तरी जिल्ला अदालतबाट पाँच दिनको म्याद थप गरी लागुऔषध मुद्दामा अनुसन्धान अगाडि बढाइएको प्रहरी नायव उपरीक्षक डम्बरबहादुर पुरीले जानकारी दिएका छन्।