हनुमाननगर कंकालिनीमा करिब ५५ प्रतिशत मतदान

भुपदेव माली,
राजविराज, २१ फाल्गुन ।
 सप्तरीको हनुमाननगर कंकालिनी नगरपालिकाका १४ वटै वडामा प्रतिनिधिसभा सदस्य निर्वाचन शान्तिपूर्ण रूपमा सम्पन्न भएको छ। मतदान केन्द्रका अधिकृतहरूका अनुसार नगरभर करिब ५५ प्रतिशतको हाराहारीमा मतदान भएको छ।
केही मतदान केन्द्रहरूमा ४६ प्रतिशत मात्र मतदान भए पनि अन्य केन्द्रहरूमा ५५ प्रतिशतभन्दा माथि मतदान भएकाले समग्रमा करिब ५५ प्रतिशत मतदान भएको जनाइएको छ। मतदान प्रक्रिया बिहानदेखि साँझसम्म शान्तिपूर्ण वातावरणमा सम्पन्न भएको स्थानीय प्रशासनले जनाएको छ।
नगरको वडा नम्बर ४ मदवापुरस्थित तीन मतदान केन्द्रमध्ये मावि मदवापुर मतदान केन्द्रमा अपराह्न ४ बजेसम्म १ हजार ५ सय ७६ मतदातामध्ये ७ सय १३ जनाले मतदान गरेका थिए। त्यस्तै वडा कार्यालयस्थित मतदान केन्द्रमा १ हजार ८२ मतदातामध्ये ६ सय ६० जनाले मतदान गरेका छन्।
यस्तै बीपी आधारभूत विद्यालय मदवापुरस्थित मतदान केन्द्रमा १ हजार ३ सय २८ मतदातामध्ये ९ सय ४ जनाले आफ्नो मताधिकार प्रयोग गरेको जनाइएको छ।
समग्रमा नगरका सबै मतदान केन्द्रहरूमा शान्तिपूर्ण वातावरणमा मतदान सम्पन्न भएको र मतपेटिका सुरक्षित रूपमा संकलन गरी मतगणनास्थलतर्फ पठाउने तयारी भइरहेको निर्वाचन अधिकारीहरूले बताएका छन्।