हाम्रा माग सम्बोधन नगरी चुनाव किन? – घाइते जेनजीको प्रश्न

काठमाडौं, फागुन १८ । ‘जेनजी सुशासन योद्धा’का रूपमा परिचित घाइते अभियन्ताहरूले आफ्ना माग सम्बोधन नगरी निर्वाचन प्रक्रिया अघि बढाइएको भन्दै आपत्ति जनाएका छन्। सोमबार राजधानीमा आयोजित पत्रकार सम्मेलनमा उनीहरूले यथास्थितिमा हुने चुनावले देशलाई निकास दिन नसक्ने दाबी गरेका हुन्। जेनजी अगुवा बुद्धनाथ सिंहले ऐतिहासिक जेनजी आन्दोलनका उपलब्धिहरूलाई सरकारले बेवास्ता गर्दै चुनावमा केन्द्रित भएको आरोप लगाए। उनले ‘नेत्रवाद दर्शन जेन–जी घर यात्रा’ अवधारणामार्फत देशको समग्र समस्या समाधानको खाका तयार गरिएको दाबी गर्दै सबैलाई त्यस अभियानमा गोलबन्द हुन आग्रह गरे। उनका अनुसार अनसनपछि सरकारसँग नवनिर्वाचित संसदको पहिलो बैठकमा आफूहरूले तयार पारेका पारदर्शी नीति, नियम तथा सदाचारी योजनाहरू प्रस्तुत गर्ने सहमति भएको थियो। अनसनरत विजय अधिकारीले राजनीतिक दलहरूको भ्रष्टाचार, कुशासन र अपारदर्शीताका कारण जेनजी पुस्ता विद्रोह गर्न बाध्य भएको बताए। जेनजीकै बलमा बनेको सरकार आफूहरूप्रति असहिष्णु बनेको उनको आरोप थियो। अशोक घोरासैनीले विश्व शान्तिका लागि नेपालले नेतृत्वदायी भूमिका खेल्न सक्ने दाबी गर्दै त्यससम्बन्धी दस्तावेज आफूहरूसँग रहेको बताए। आर्यन अधिकारीले आसन्न निर्वाचनले पनि देशलाई निकास दिन नसक्ने ठोकुवा गर्दै पुनः आन्दोलनमा उत्रिनुपर्ने अवस्था आउन सक्ने संकेत गरे। लक्ष्मी देवीले राजसंस्था हटाइएपछि देश अस्थिरतामा फसेको टिप्पणी गरिन्। राज कठायतले सरकारले माग पूरा गर्ने वाचा गरे पनि त्यसतर्फ ध्यान नदिएको आरोप लगाए। मनिष चापागाँईले चुनावपछि पनि माग सम्बोधन नभए कडा प्रतिरोध गर्ने चेतावनी दिए। उल्लेखनीय छ, जेनजी सुशासन योद्धाहरूले फागुन ९ देखि १३ गतेसम्म माइतीघर मण्डला मा पाँच दिन आमरण अनसन गरेका थिए। आयोजकका अनुसार सरकारले नेपालको संविधान २०७२ आवश्यकता अनुसार संशोधन गरी जेनजीका माग सम्बोधन गर्ने सहमति जनाएको थियो।