जनमत पार्टीका पूर्व नेता निर्मल कपैर यादव स्वाभिमान पार्टीमा प्रवेश

लिलाकान्त यादव,
राजविराज, २० माघ ।
हनुमाननगर कंकालिनी । जनमत पार्टीका पूर्व नेता निर्मल कपैर यादवले स्वाभिमान पार्टीमा औपचारिक रूपमा प्रवेश गर्नुभएको छ । हनुमाननगर कंकालिनी नगरपालिका वडा नम्बर १४ मा आयोजित पार्टी प्रवेश कार्यक्रममा उहाँलाई पार्टी नेतृत्व तथा कार्यकर्ताहरूले आत्मीय र भव्य स्वागत गरेका हुन् ।
कार्यक्रममा बोल्ने वक्ताहरूले यादवको लामो राजनीतिक अनुभव र योगदानको प्रशंसा गर्दै उहाँको प्रवेशले स्वाभिमान पार्टीको संगठनलाई थप मजबुत बनाउने विश्वास व्यक्त गरे । पार्टीका अनुसार अनुभवी र जनसम्पर्क भएका नेताको आगमनले स्थानीय तहमा पार्टीको प्रभाव विस्तारमा महत्वपूर्ण भूमिका खेल्ने अपेक्षा गरिएको छ ।
कार्यक्रममा पूर्व मन्त्री नवल किशोर साह, वडा नम्बर १४ का युवा नेता सूर्यनारायण यादव, पूर्व मेयर शैलेश शाहसहित स्थानीय नेता, कार्यकर्ता र समर्थकहरूको उल्लेखनीय उपस्थिति रहेको थियो ।
हनुमाननगर कंकालिनी नगरपालिकामा स्वाभिमान पार्टीप्रतिको जनआकर्षण बढिरहेको सन्दर्भमा निर्मल कपैर यादवको प्रवेशले पार्टीको अभियान, संगठन विस्तार र जनसम्पर्कलाई थप गति दिने पार्टी नेताहरूले बताएका छन् ।