नेपाल सांस्कृतिक अन्तर्राष्ट्रिय चलचित्र महोत्सव सुरु, ३९ देशका ८५ चलचित्र प्रदर्शन

ईमधेश न्यूज सम्वाददाता,
काठमाडौं, १७ माघ ।
 नेपाल संस्कृति तथा चलचित्र केन्द्रको आयोजनामा सातौँ नेपाल कल्चरल इन्टरनेशनल फिल्म फेस्टिभल सुरु भएको छ । माघ १६ गते चाबहिलस्थित चलचित्र विकास बोर्डमा आयोजित उद्घाटन समारोहमा राष्ट्रिय तथा अन्तर्राष्ट्रिय निर्णायक मण्डलका सदस्यहरू, विभिन्न देशबाट आएका प्रतिनिधि तथा चलचित्रकर्मीहरूको उल्लेखनीय सहभागिता रहेको थियो ।
उद्घाटन समारोहका प्रमुख अतिथि चलचित्र विकास बोर्ड नेपालका अध्यक्ष दिनेश डी.सी. रहनुभएको थियो । राष्ट्रिय निर्णायक मण्डलतर्फ अभिनेत्री तथा निर्देशक दीपाश्री निरौला, लेखक–निर्देशक रमेश बुढाथोकी र निर्माता तथा छायाँकार रविन आचार्य सहभागी थिए । अन्तर्राष्ट्रिय निर्णायक मण्डलमा बेलायतकी निर्माता एड्रिना जुली कुलिग र अर्जेन्टिनाका निर्देशक तथा चिकित्सक डा. जर्ज गुइलेर्मो क्याराभोत्ता रहेका छन् ।
समारोहमा फ्रान्स, भारत, बंगलादेश, लिथुआनिया, जर्मनी, अमेरिका, अस्ट्रेलिया र इजरायलसहित विभिन्न देशका आठ अन्तर्राष्ट्रिय प्रतिनिधिलाई ढाका टोपी र खादा ओढाएर स्वागत गरिएको थियो । माघ १८ गतेसम्म सञ्चालन हुने महोत्सवमा ३९ देशका ८५ चलचित्र प्रदर्शन भइरहेका छन् । समापन समारोहमा उत्कृष्ट चलचित्र तथा स्रष्टाहरूलाई अवार्ड प्रदान गरिनेछ ।