सहिद दिवस २०८२ः उपराष्ट्रपति यादवद्वारा सहिदप्रति श्रद्धाञ्जली र राष्ट्रिय एकताको आह्वान

लिलाकान्त यादव,
काठमाडौं, १६ माघ ।
 सहिद दिवस २०८२ का अवसरमा उपराष्ट्रपति रामसहाय प्रसाद यादवले नेपालको स्वतन्त्रता, सार्वभौमिकता, भौगोलिक अखण्डता, नागरिक अधिकार, समानता, समावेशिता तथा संघीय लोकतान्त्रिक गणतन्त्रको स्थापना र संरक्षणका लागि बलिदान दिएका सबै ज्ञात–अज्ञात सहिदप्रति हार्दिक नमन, सम्मान र श्रद्धाञ्जली अर्पण गर्नुभएको छ।
उपराष्ट्रपति यादवले माघ १६ का दिन देशभर आयोजना हुने कार्यक्रमहरूले सहिदहरूको अदम्य साहस, त्याग र बलिदान स्मरण गराउने मात्र नभई समृद्ध र न्यायपूर्ण भविष्यतर्फ अघि बढ्न प्रेरणा दिने बताउनुभयो। उहाँले सहिदहरूको योगदानले सामाजिक न्याय, समान अवसर, पहिचान र सहअस्तित्वमा आधारित समृद्ध नेपाल निर्माणतर्फ मार्गदर्शन गरेको उल्लेख गर्नुभयो।
सहिद दिवस स्मरणको दिन मात्र नभई शान्ति, सुव्यवस्था र समृद्धिको संकल्प लिने अवसरसमेत भएको उल्लेख गर्दै उहाँले समतामूलक समाज र समावेशी लोकतन्त्र सुदृढ गर्ने प्रतिज्ञा लिन आग्रह गर्नुभयो। देशको शान्ति, विकास र सुशासन राष्ट्रिय एकताबाटै सम्भव हुने उल्लेख गर्दै सबै राजनीतिक दल, नागरिक समाज र आम नागरिकलाई सहिदहरूको सपना साकार पार्न एकताबद्ध भएर अघि बढ्न आह्वान गर्नुभएको छ।
सन्देशको अन्त्यमा उपराष्ट्रपति यादवले सहिदहरूको आदर्शलाई जीवनमा उतार्दै लोकतान्त्रिक मूल्यहरूको रक्षा र समृद्ध नेपाल निर्माणमा योगदान गर्न सबैलाई आग्रह गर्नुभएको छ।