निर्वाचन आचारसंहिता २०८२ लागू, जिल्लामा अनुगमन अधिकृत तोकिए

ईमधेश न्यूज सम्वाददाता,
काठमाडौं, १४ माघ ।
 निर्वाचन आयोगले प्रतिनिधि सभा सदस्य निर्वाचनलाई स्वच्छ, निष्पक्ष, पारदर्शी र विश्वसनीय रूपमा सम्पन्न गर्न निर्वाचन आचारसंहिता, २०८२ लागू गरेको छ। आयोगका अनुसार आचारसंहिता २०८२ माघ १० गते राति १२:०० बजेदेखि कार्यान्वयनमा आएको हो।
आयोगले २०८२ साल फागुन २९ गते सम्पन्न हुने प्रतिनिधि सभा निर्वाचनलाई लक्षित गर्दै आचारसंहिताको प्रभावकारी कार्यान्वयन सुनिश्चित गर्न जिल्लास्तरमा निर्वाचन आचारसंहिता अनुगमन अधिकृत तोकेको जनाएको छ। आचारसंहिता, २०८२ को दफा ३२ बमोजिम आर्थिक बाहेकका विषयमा सहायक प्रमुख जिल्ला अधिकारीहरू र आर्थिक विषयमा प्रमुख कोष नियन्त्रक तथा कोष नियन्त्रकहरू लाई फरक–फरक कार्यजिम्मेवारीसहित अनुगमन अधिकृतको रूपमा खटाइएको छ।
निर्वाचन आयोगले सम्बन्धित सबै निकायलाई आचारसंहिता पालना गर्न र अनुगमनलाई प्रभावकारी बनाउन आवश्यक सहकार्य गर्न अनुरोध गरेको छ। आयोगका अनुसार आचारसंहिता कडाइका साथ लागू गरिनेछ, जसबाट निर्वाचन प्रक्रिया विश्वसनीय र मर्यादित हुने विश्वास लिइएको छ।
उक्त जानकारी निर्वाचन आयोगका सहसचिव तथा प्रवक्ता नारायण प्रसाद भण्डारीद्वारा जारी प्रेस विज्ञप्तिमार्फत सार्वजनिक गरिएको हो।