उपराष्ट्रपति यादव द्वारा विजयादशमी, २०८२ को शुभकामना सन्देश

लिलाकान्त यादव,
काठमाडौँ, १२ असोज ।
 उपराष्ट्रपति रामसहाय प्रसाद यादवले विजयादशमी, २०८२ को अवसरमा स्वदेश तथा विदेशमा रहेका सम्पूर्ण नेपाली दिदीबहिनी तथा दाजुभाइहरूलाई मंगलमय शुभकामना दिएका छन्।
शुभकामना सन्देशमा उनले नेपाल विविध सांस्कृतिक, धार्मिक, ऐतिहासिक र परम्परागत सम्पदाले समृद्ध मुलुक भएको उल्लेख गर्दै यहाँका चाडपर्वहरूले राष्ट्रिय एकता, सामाजिक घनिष्ठता, आध्यात्मिक चेतना र सांस्कृतिक निरन्तरतामा महत्वपूर्ण भूमिका खेल्ने बताए।
विजयादशमी असत्यमाथि सत्य र अधर्ममाथि धर्मको विजयको प्रतीक भएकाले यसले मानव जीवनमा सदाचार, सहिष्णुता, आत्मसंयम र सत्यको मार्ग अँगाल्न प्रेरणा दिने उपराष्ट्रपति यादवको भनाइ छ।
यस पर्वले परिवारजनबीच पुनर्मिलन, आपसी सद्भाव र सामाजिक समरसता अभिवृद्धि गर्ने परम्परालाई सुदृढ बनाउने भन्दै उनले समाजमा रहेका कटुतालाई विस्मृत गर्दै आपसी सम्बन्धलाई मजबुत बनाउन विजयादशमी महत्त्वपूर्ण हुने बताए।
काम, क्रोध, लोभ, मोह, अहंकार र हिंसाजस्ता नकारात्मक प्रवृत्ति त्यागी सकारात्मक सोच र सुसंस्कारको विकास गर्न विजयादशमीले प्रेरित गर्ने विश्वास व्यक्त गर्दै उनले संविधानको पालना, संरक्षण र कार्यान्वयनका लागि सबैले संयम, संवाद र सहकार्यको मार्ग अँगाल्नुपर्नेमा जोड दिए।
सन्देशमा उपराष्ट्रपति यादवले असत्य, अन्याय र विभाजनका विरुद्धमा विजयादशमीले नेपालीलाई एकजुट हुन उत्प्रेरित गर्ने उल्लेख गर्दै सत्य, सदाचार, सद्भाव, भाइचारा र सहिष्णुताको बाटोमा अघि बढ्न शुभेच्छा व्यक्त गरेका छन्।