सेवाग्राहीका लागि मोबाइल चार्जिङ स्टेशन हस्तान्तरण

लिलाकान्त यादव,
राजविराज, १० असार ।
 नेपाल टेलिकम शाखा कार्यालय कञ्चनपुर, सप्तरीले ईलाका प्रशासन कार्यालय कञ्चनपुरमा आउने सेवाग्राहीहरूका लागि आकस्मिक मोबाइल चार्जिङ सुविधा उपलब्ध गराउने उद्देश्यले मोबाइल चार्जिङ स्टेशन हस्तान्तरण गरेको छ।
एक सानो कार्यक्रमकाबीच टेलिकम कार्यालयका प्रतिनिधिले चार्जिङ स्टेशन इलाका प्रशासन कार्यालयलाई हस्तान्तरण गरेका हुन्। कार्यालयमा दैनिक रूपमा आउने सेवाग्राहीमध्ये धेरैजसोको मोबाइल चार्जसम्बन्धी समस्या हुने गरेको जनाउँदै, टेलिकमले यो जनमैत्री सुविधा प्रदान गरेको हो।
ईलाका प्रशासन कार्यालयका प्रमुखले नेपाल टेलिकमप्रति धन्यवाद ज्ञापन गर्दै भने, “छरितो सेवा प्रवाहका लागि यो चार्जिङ सुविधा निकै उपयोगी हुनेछ। यस्ता सानातिना सहयोगले पनि सेवा गुणस्तरमा फरक पार्छ।”
नेपाल टेलिकमका प्रतिनिधिले आगामी दिनमा समेत सामुदायिक उत्तरदायित्वअन्तर्गत यस्ता सहकार्य जारी रहने प्रतिबद्धता जनाए।
कार्यक्रममा दुबै निकायका कर्मचारी, सेवाग्राही तथा स्थानीय समुदायका प्रतिनिधिहरूको उपस्थिति रहेको थियो।