स्पार्कल इन्टरटेन्मेन्टद्वारा ‘मिस्टर एण्ड मिस आइडल सिजन–३’ घोषणा

ईमधेश सम्वाददाता,
काठमाडौं, ०८ चैत्र ।
 स्पार्कल इन्टरटेन्मेन्ट ले ‘मिस्टर एण्ड मिस सिनियर एण्ड जुनियर आइडल सिजन–३’ को घोषणा गरेको छ। शनिबार काठमाडौंको सिटी सेन्टरमा आयोजित पत्रकार सम्मेलनमार्फत प्रतियोगिता वैशाख ५ गतेदेखि सुरु हुने जानकारी दिइएको हो।
आयोजकका अनुसार बालबालिका तथा किशोर–किशोरीहरूमा लुकेका प्रतिभा उजागर गर्ने, आत्मविश्वास र व्यक्तित्व विकासमा सहयोग पु¥याउने तथा उनीहरूलाई उचित प्लेटफर्म उपलब्ध गराउने उद्देश्यले प्रतियोगिता आयोजना गर्न लागिएको हो।
यस सिजनमा सहभागीका लागि उमेर समूह निर्धारण गरिएको छ। जुनियर ए तर्फ ६–८ वर्ष, जुनियर बी तर्फ ९–१२ वर्ष र सिनियर तर्फ १३–१५ वर्षका बालबालिकाले सहभागिता जनाउन सक्नेछन्। इच्छुक अभिभावकहरूले वैशाख ५ गतेसम्म नाम दर्ता गराउन सक्ने आयोजकले जनाएको छ।
नाम दर्तापछि सहभागीलाई करिब एक महिना प्रशिक्षण दिइनेछ भने जेठ २ गते राष्ट्रिय नाचघर मा ग्राण्ड फिनाले आयोजना गरिनेछ।
अघिल्ला दुई सिजनमा समेत प्रतियोगिताले उल्लेखनीय सफलता हासिल गरेको थियो। पहिलो सिजनमा रियान्शु दाहाल, पूर्णिमा थापा, सृष्टि बम्जन र अनमोल उप्रेती विजेता बनेका थिए भने दोस्रो सिजनमा कृषा हुमागाई, स्वीकृति पुन र प्रभाव राईले उपाधि जितेका थिए।
पत्रकार सम्मेलनमा कम्पनीकी सीईओ नितु श्रेष्ठले अभिभावकहरूलाई आफ्ना सन्तानको व्यक्तित्व विकासका लागि समयमै सहभागिता गराउन आग्रह गरिन्। कार्यक्रममा कोरियोग्राफर रोजिन शाक्य, सामाजिक अभियन्ता पुण्य गौतम र मिना ढकाललगायतले प्रतियोगिताको सफलताको कामना व्यक्त गरेका थिए।