अन्तर्राष्ट्रिय नर्स दिवस

आधुनिक स्वास्थ्य सेवाको मेरुदण्डका रूपमा परिचित नर्सहरूको सम्मानमा हरेक वर्ष मे १२ मा अन्तर्राष्ट्रिय नर्स दिवस मनाइन्छ। यो दिवस आधुनिक नर्सिङ सेवाकी अग्रदूत ँयिचभलअभ ल्ष्नजतष्लनबभि को जन्मदिनको अवसरमा विश्वभर मनाउने गरिन्छ। मानव सेवा, करुणा, समर्पण र अनुशासनको प्रतीक बनेकी नाइटिङ्गेलले नर्सिङ पेसालाई केवल उपचारको काम नभई मानवीय सेवाको सर्वोच्च उदाहरणका रूपमा स्थापित गरेकी थिइन्।
क्रिमिया युद्धका समयमा घाइते सैनिकहरूको उपचारमा दिनरात खटिएकी नाइटिङ्गेललाई “ए लेडी विथ ए ल्याम्प” भनेर चिनिन्थ्यो। रातको अन्धकारमा लालटिन बोकेर बिरामीको अवस्था बुझ्न पुग्ने उनको सेवाभावले संसारलाई नर्सिङको वास्तविक अर्थ बुझाएको थियो। अस्पतालमा सरसफाइ, बिरामीप्रतिको सम्मान, अनुशासित सेवा र भावनात्मक हेरचाहलाई उनले स्वास्थ्य सेवाको आधार बनाइन्। आज विश्वभर प्रचलित आधुनिक नर्सिङ प्रणालीमा उनको योगदान अविस्मरणीय मानिन्छ।
नेपालमा पनि नर्सिङ सेवाको विस्तारसँगै हजारौँ नर्सहरू स्वास्थ्य क्षेत्रमा सक्रिय छन्। गाउँदेखि सहरसम्म, अस्पतालदेखि स्वास्थ्य चौकीसम्म बिरामीको उपचार, हेरचाह र मनोबल बढाउने कार्यमा नर्सहरूको भूमिका अतुलनीय छ। विशेषगरी महामारी, विपद् र आपतकालीन अवस्थामा नर्सहरूले निर्वाह गरेको जिम्मेवारीले उनीहरूको महत्व अझ स्पष्ट बनाएको छ।
तर, सेवाको यो महान् पेशामा अझै पनि पर्याप्त सम्मान, सुरक्षित कार्य वातावरण, उचित पारिश्रमिक र मानसिक स्वास्थ्यको सवाल चुनौतीका रूपमा देखिन्छन्। धेरै नेपाली नर्सहरू विदेशिन बाध्य हुनुको पछाडि यही यथार्थ जोडिएको छ। त्यसैले नर्स दिवस केवल औपचारिक शुभकामनाको दिन नभई स्वास्थ्यकर्मीहरूको अधिकार, सुरक्षा र सम्मानबारे गम्भीर समीक्षा गर्ने अवसर पनि हो।
मानव सेवामा समर्पित सम्पूर्ण नर्सहरूप्रति उच्च सम्मान व्यक्त गर्दै अन्तर्राष्ट्रिय नर्स दिवसले करुणा, सेवा र मानवताको भावनालाई अझ मजबुत बनाओस्।