इन्धन मूल्य नघटाए आयल निगम घेराउ गर्ने जेनजीको चेतावनी

ईमधेश न्युज सम्वाददाता,
काठमाडौं, ०६ वैशाख ।
 राष्ट्रि जेनजी नागरिक अभियानले पेट्रोलियम पदार्थको मूल्यवृद्धि तत्काल नघटाए कडा आन्दोलनमा उत्रिने चेतावनी दिएको छ। राजधानीको संवाद डबलीमा आयोजित पत्रकार सम्मेलनमार्फत अभियानले सरकार र नेपाल आयल निगमलाई २४ घण्टे अल्टिमेटम दिएको हो।
अभियानका संयोजक सुनिल सिंहले निर्धारित समयभित्र मूल्य समायोजन नभए आयल निगम घेराउ गर्ने घोषणा गरे। उनले हालको मूल्यवृद्धिलाई जनविरोधी कदमको संज्ञा दिँदै सरकारप्रति असन्तुष्टि व्यक्त गरे। “जनतालाई महँगीको भारले थिच्ने काम अस्वीकार्य छ, हाम्रो आवाज नसुने संघर्षमा जान बाध्य हुनेछौं,” उनले भने।
सह–संयोजक अजय सोडारीले छिमेकी देशहरूसँग तुलना गर्दा नेपालमा पेट्रोलियम पदार्थको मूल्य अस्वाभाविक रूपमा बढाइएको आरोप लगाए। उनले भारतमा तुलनात्मक रूपमा कम मूल्य हुँदा नेपालमा अत्यधिक महँगो हुनु गम्भीर विषय भएको बताए। कर छुटको घोषणा गरिए पनि व्यवहारमा त्यसको लाभ जनताले नपाएको उनको दाबी छ।
अभियानका अन्य प्रतिनिधिहरूले पनि मूल्यवृद्धिले समग्र बजारमा महँगी बढाउने चेतावनी दिएका छन्। उनीहरूले सरकारले जनजीविकासँग सम्बन्धित मुद्दामा गम्भीरता नदेखाएको भन्दै आक्रोश व्यक्त गरे।
अभियानले समयमै माग सम्बोधन नभए सडक आन्दोलन चर्काउने र थप दबाबमूलक कार्यक्रम घोषणा गर्ने चेतावनी दिएको छ।