महेस बस्नेतविरुद्ध पक्राउ प्रक्रिया अघि बढ्ने दाबी

ईमधेश न्यूज सम्वाददाता,
काठमाडौं, १७ चैत्र ।
 नेकपा (एमाले)का सचिव महेस बस्नेतविरुद्ध चाँडै पक्राउ प्रक्रिया अघि बढ्ने दाबी पीडित भनिएकी सोभा पाठकले गरेकी छन्। मंगलबार राजधानीको संवाद डबलीमा पत्रकार सम्मेलन गर्दै पाठकले बस्नेतले सामाजिक सञ्जालमा लेखेको पक्राउ पूर्जीसम्बन्धी स्टाटस भ्रामक रहेको बताइन्।
उनले आफूले बस्नेतविरुद्ध पक्राउ पूर्जी माग गर्दै उजुरी दिएको र कानुनी प्रक्रियाअनुसार बस्नेत हिरासतमा जाने निश्चित रहेको जिकिर गरिन्। बस्नेतले अदालतले पक्राउ पूर्जी दिन अस्वीकार गरेको भन्दै सार्वजनिक रूपमा खुसी व्यक्त गरेकोप्रति आपत्ति जनाउँदै पाठकले त्यसलाई केही सञ्चारमाध्यमले गलत रूपमा प्रस्तुत गरेको आरोप लगाइन्।
पाठकका अनुसार टेकुस्थित प्रहरी परिसरमा जाहेरी दर्ता भइसकेको छ। काठमाडौं जिल्ला अदालतले चैत १६ गतेको आदेशमा पक्राउ गर्न नमिल्ने स्पष्ट रूपमा नभनेको, बरु मुद्दासम्बन्धी सक्कल मिसिल प्राप्त भएपछि कानुनबमोजिम प्रक्रिया अघि बढ्ने उल्लेख गरेको उनले जानकारी दिइन्।
अदालतको आदेश उद्धृत गर्दै पाठकले भनिन्, “विवाद उच्च अदालतमा विचाराधीन रहेकाले अन्तिम निर्णयका लागि आवश्यक कागजात आएपछि कानुनअनुसार अगाडि बढ्ने भनिएको छ, हालका लागि मागबमोजिम गर्न नमिल्ने मात्र भनिएको हो।”
उनले आफू न्यायका लागि अन्तिमसम्म लड्ने बताउँदै अदालतबाट चाँडै पक्राउ पूर्जी जारी हुने विश्वास व्यक्त गरिन्।