घृणात्मक अभिव्यक्ति रोक्न आग्रह: सुनिल बाबु पन्तको अपिल

ईमधेश न्यूज सम्वाददाता,
काठमाडौं, ०५ बैशाख ।
 पूर्व संविधानसभा सदस्य सुनिल बाबु पन्तले काठमाडौं महानगरपालिकाका प्रमुख बालेन शाहलाई पुरानो ¥याप भिडियोबारे उठेको विवाद संवेदनशील रूपमा सम्बोधन गर्न आग्रह गरेका छन्। उनले सम्बन्धित भिडियो हटाउने पहल गर्न र यसले पारिरहेको सामाजिक प्रभावप्रति जिम्मेवार बन्नुपर्ने बताएका छन्।
पन्तका अनुसार १२ वर्षअघि प्रयोग गरिएको उक्त भिडियोका शब्दहरूले लैङ्गिक तथा यौनिक अल्पसंख्यक समुदायमाथि मनोवैज्ञानिक असर, सामाजिक अपमान र घृणाको वातावरण सिर्जना गरेको छ। उनले यो विषयलाई राजनीतिक रूपमा नभई मानवअधिकार र सम्मानसँग जोडिएको संवेदनशील मुद्दाका रूपमा लिनुपर्ने बताए।
उनले उजुरी दर्ता गरेपछि सामाजिक सञ्जालमा उजुरीकर्तामाथि बढ्दै गएको गालीगलौज, अपमानजनक टिप्पणी र चरित्रहत्या गर्ने अभिव्यक्तिप्रति गम्भीर चिन्ता व्यक्त गरे। उनका अनुसार यस्ता गतिविधिले समुदायमा भय, असुरक्षा र मानसिक पीडा थप बढाएको छ, जुन पूर्ण रूपमा अस्वीकार्य हो।
‘न्याय खोज्ने नागरिकलाई धम्की र अपमान सहन बाध्य बनाउनु लोकतान्त्रिक मूल्य र मानवअधिकारविपरीत हो,’ पन्तले भने। उनले समुदायले उठाएको आवाज कुनै षड्यन्त्र नभई विगतका शब्दहरूले पारेको असरप्रति जवाफदेहिता र सुधारको माग मात्र भएको स्पष्ट पारे।
साथै, उनले नेतृत्वको साँचो मूल्य गल्ती नहुनुमा मात्र नभई गल्ती स्वीकार गरी सुधार गर्ने क्षमतामा निहित हुने उल्लेख गर्दै सबै पक्षलाई संयम र जिम्मेवारीका साथ प्रस्तुत हुन आग्रह गरेका छन्।