कोरोना विरुद्धको खोप लगाएकै दिन सप्तरीमा एक जनाको मृत्यु

शुभ नारायण यादव,
राजविराज, २७ असार ।
कोभिड–१९ विरुद्ध दोस्रो मात्राको खोप लगाएकै दिन सप्तरीमा एक जनाको मृत्यु भएको छ । सप्तरीको तिलाठी कोइलाडी गाउँपालिका–७ का ६५ देवराम मण्डलले प्राथमिक स्वास्थ्य सेवा केन्द्र तोपा पुगेर दोस्रो मात्राको खोप लगाएका थिए ।
साँझमा मण्डललाई असहज भएपछि उपचारको लागि राजविराज स्थित गजेन्द्रनारायण सिंह अस्पताल ल्याउने क्रममा गएराती मृत्यु भएको स्वास्थ्य कार्यालय सप्तरीका निमित्त प्रमुख दुनियालाल यादवले जानकारी दिनु भयो ।
‘यद्यपी, उहाँको मृत्युको कारण भने खोप होइन्, उहाँले दिउँसो १२ बजेतिर नै दोस्रो मात्राको खोप लगाए पछि गाउँकै एउटा पञ्चायतीमा सहभागी भएर साँझ मदिरा सेवन गरेपछि उहाँलाई असहज भएको बुझियो ।’
उहाँलाई उपचारको लागि अस्पताल ल्याउन लागिएकोमा बाटैमा उहाँको मृत्यु भएको निमित्त प्रमुख यादवले जानकारी दिनुभयो ।