शुभ नारायण यादव,
राजविराज,२३ फागुन ।
सप्तरीको राजविराजबाट कटुवा पेस्तोल सहित २ जनालाई प्रहरीले पक्राउ गरेको छ ।
सप्तरीको राजबिराज नगरपालिका वडा न.–६ मेहतर टोलबाट कटुवा पेस्तोल र २ राउण्ड गोली सहित २ जनालाई शनिबार दिउँसो पक्राउ गरेको हो । जिल्लाको बिष्णुपुर गाउँपालिका वडा न.–७ बस्ने २० वर्षीय महेन्द्र कुमार शर्मा र सोही गाउँपालिका–५ बस्ने १९ वर्षीय प्रभु साहलाई पक्राउ गरिएको जिल्ला प्रहरी कार्यालय सप्तरीले आज पत्रकार सम्मेलन गरी सार्वजनिक गरेको छ ।
बिशेष सूचनाको आधारमा वडा प्रहरी कार्यालय राजबिराजबाट खटिएको प्रहरीले स.७ प ९६७० नम्बरको मोटरसाइकललाई चेकजाँच गर्ने क्रममा मोटरसाइकल चालक शर्मा र मोटरसाइकलमा सवार साहलाई पेस्तोल र गोली पक्राउ गरेको प्रहरीले जनाएको छ । पक्राउ परेका दुवै जनालाई जिल्ला प्रहरी कार्यालय सप्तरीको हिरासतमा राखेर अनुसन्धान भइरहेको प्रहरीले जनाएको छ ।
