सप्तरीमा भएको मोटरसाइकल दुर्घटनामा दुई जनको मृत्यु, एक जना गम्भीर घाइते

शुभ नारायण यादव
सप्तरी , ८ माघ । हुलाकी राजमार्ग अन्तर्गत सप्तरीको खडक नगरपालिका वडा न.–११ बनौलीस्थित सडकमा मोटरसाईकल दुर्घटना हुँदा दुई जनाको मृत्यु भएको छ भने एक जना गम्भीर घाइते भएका छन् । पूर्वतर्फ आउँदै गरेको तीन जना सवार प्र.२–०१–००१–६१४६ मोटरसाईकल अनियन्त्रित भएर गएराति दुर्घटना भएको हो ।
साे दुर्घटनामा मोटरसाईकल चालक सप्तरीको खडक नगरपालिका वडा न.–११ बनौलीका २१ वर्षीय शिवेन्द्र साह र बीचमा सवार सोही ठाउँका २५ वर्षीय अरविन्द यादवको मृत्यु भएको जिल्ला प्रहरी कार्यालय सप्तरीले जनाएको छ । उक्त दुर्घटनामा परेर गम्भीर घाइते भएका दुवै जनाको उपचारकोलागि अस्पताल लैजाने क्रममा मृत्यु भएको जिल्ला प्रहरी कार्यालय सप्तरीका डिएसपी एव प्रबक्ता भुवनेश्वर प्रसाद साहले जानकारी दिनुभयाे ।
मोटरसाईकलमा पछाडी सवार घाइते भएका २१ वर्षीय सुनीलकुमार चौधरीको राजविराजस्थित छिन्नमस्ता अस्पतालमा भर्ना गरिएको छ । सुनीलको टाउको र शरीरको विभिन्न भागमा चोट लागेको जनाएको छ ।यता मृतकको शव शल्यक्रियाकोलागि राजविराज स्थित गजेन्द्रनारायण सिंह अस्पतालमा ल्याइएको छ भने दुर्घटनाबारे थप अावश्यक अनुसन्धान कार्य भइरहेको डिएसपी साहले जानकारी दिनुभयो ।