कांग्रेस–कम्युनिस्टकै कारण देश असहज अवस्थामा पुगेको दाबी

ईमधेश न्यूज सम्वाददाता,
राजविराज, २५ माघ ।
 जनता समाजवादी पार्टी (जसपा) नेपालका अध्यक्ष उपेन्द्र यादवले कांग्रेस र कम्युनिस्ट दलहरूले देशमा सुशासन, विकास र समृद्धि कायम गर्न नसक्दा मुलुक असहज अवस्थामा पुगेको बताएका छन्।
सप्तरीको रुपनी गाउँपालिका–३ हर्दियामा शनिबार आयोजित चुनावी छलफल तथा भेटघाट कार्यक्रममा बोल्दै उनले २०४६ सालपछिका अधिकांश सरकारमा कांग्रेस र कम्युनिस्ट नै जिम्मेवार रहेको उल्लेख गरे। “सुशासन र विकास दिन नसक्दा युवापुस्ता आन्दोलित भएको छ, देश असहज अवस्थामा पुगेको छ,” उनले भने।
शिक्षा, स्वास्थ्य र उद्योग क्षेत्रलाई सुदृढ गर्नुको साटो निजीकरण र पार्टीकरण गरिएकाले सरकारी संरचना कमजोर भएको उनको आरोप थियो। सप्तरी क्षेत्र नम्बर ३ का उम्मेदवारसमेत रहेका यादवले चुनावका बेला बाचा गरेर कार्यान्वयन नगर्ने नेतासँग मतदाताले निरन्तर प्रश्न गर्नुपर्ने बताए। “जनताले प्रश्न सोधिरहे मात्र नेता जिम्मेवार बन्छन्,” उनले भने।
जसपाकै पहलमा स्वास्थ्य, शिक्षा र पूर्वाधार क्षेत्रमा काम भएको दाबी गर्दै उनले रामराजा प्रसाद सिंह स्वास्थ्य विज्ञान प्रतिष्ठान, कृषि विश्वविद्यालय, अस्पताल र सडक निर्माणजस्ता योजनाको चर्चा गरे।
यसैबीच, तत्कालीन रायपुर गाविसका पूर्व अध्यक्ष हिरालाल मण्डल नेपाली कांग्रेस परित्याग गरी जसपा नेपालमा प्रवेश गरेका छन्। अध्यक्ष यादवले उनलाई स्वागत गरेका हुन्।