राष्ट्रियता हाम्रो अस्तित्वको आधारः उपराष्ट्रपति यादव

लिलाकान्त यादव,
काठमाडौं, २१ माघ ।
 उपराष्ट्रपति रामसहाय प्रसाद यादवले राष्ट्रियता हाम्रो अस्तित्वको आधार भएको उल्लेख गर्दै विकासका योजना नागरिकको पहिचान, संस्कृति र जीवनशैलीलाई सम्मान गर्दै अघि बढ्नुपर्ने बताउनुभएको छ। उहाँले बुधबार काठमाडौंमा आयोजित आदिवासी जनजाति आयोगको पाँचौँ वार्षिकोत्सव समारोहलाई सम्बोधन गर्दै राष्ट्रियता र समृद्धि एक–अर्काका पूरक भएको धारणा व्यक्त गर्नुभयो।
उपराष्ट्रपति यादवले विकासको नाममा विस्थापन होइन, सशक्तीकरण र अवसर विस्तारमा जोड दिन आवश्यक रहेको बताउनुभयो। नेपालको संविधानले बहुजातीय, बहुभाषिक, बहुधार्मिक तथा बहुसांस्कृतिक विविधतालाई आत्मसात गर्दै एकता, सामाजिक सद्भाव र सहिष्णुताको संरक्षण गर्ने संकल्प लिएको उल्लेख गर्दै समानुपातिक समावेशिता र सहभागितामूलक सिद्धान्तका आधारमा समतामूलक समाज निर्माण गर्ने जिम्मेवारी संवैधानिक आयोगहरूको भएको उहाँको भनाइ थियो।
आदिवासी जनजाति आयोगलाई संविधानले प्रत्याभूत गरेका अधिकारहरूको कार्यान्वयनमा मार्गदर्शक भूमिका निर्वाह गर्नुपर्ने निकायका रूपमा उल्लेख गर्दै उहाँले आदिवासी जनजाति समुदायको पहिचान, भाषा, संस्कार र संस्कृति राष्ट्रिय गौरवका आधार भएको बताउनुभयो। ती मूल्यहरूको संरक्षण र संवद्र्धन सामूहिक जिम्मेवारी भएको उहाँले स्पष्ट गर्नुभयो।
उपराष्ट्रपति यादवले आगामी फागुन २१ गते हुने प्रतिनिधि सभा निर्वाचन लोकतान्त्रिक अभ्यासलाई सुदृढ बनाउने महत्वपूर्ण अवसर भएको उल्लेख गर्दै निर्वाचनले नागरिकलाई राज्यको समान हिस्सेदारका रूपमा अनुभूत गराउने विश्वास व्यक्त गर्नुभयो।