सवारी दुर्घटना न्यूनीकरणका लागि नेपालगन्जमा स्लो बाइक प्रतियोगिता हुने

ईमधेश न्यूज सम्वाददाता,
नेपालगन्ज, २५ पौष ।
 बढ्दो सवारी दुर्घटना न्यूनीकरण तथा ट्राफिक सचेतना अभिवृद्धि गर्ने उद्देश्यले नेपालगन्जमा स्लो बाइक प्रतियोगिता आयोजना हुने भएको छ । बास नेपालले विगत पाँच वर्षदेखि निरन्तर सञ्चालन गर्दै आएको उक्त प्रतियोगिताको छैटौँ श्रृङ्खला यही कार्तिक २७ गते नेपालगन्जमा हुने जनाएको छ ।
ट्राफिक प्रहरी कार्यालयको सहकार्यमा आयोजना हुने प्रतियोगिता नेपालगन्जको न्यूरोड क्षेत्रमा सञ्चालन हुनेछ । प्रतियोगितामा सहभागीहरूले तोकिएको १०० मिटर दूरी सबैभन्दा कम गति अर्थात् सुस्त गतिमा पार गर्नुपर्नेछ । निर्धारित दूरी सबैभन्दा बढी समय लगाएर पार गर्ने प्रतियोगी विजयी घोषित हुनेछन् ।
प्रतियोगितामा प्रथम, द्वितीय र तृतीय स्थान हासिल गर्नेले क्रमशः १५ हजार, १० हजार र ५ हजार रुपैयाँ नगदसहित प्रमाणपत्र प्राप्त गर्नेछन् । बढ्दो सवारी दुर्घटनाप्रति सचेतना जगाउने, ट्राफिक नियमको पालना गर्न प्रेरित गर्ने र सीमित गतिमा सवारी चलाउने संस्कार विकास गर्ने उद्देश्यले प्रतियोगिता आयोजना गर्न लागिएको बास नेपालले जनाएको छ ।
आयोजकका अनुसार पछिल्लो समय विशेषगरी युवा पुस्ता तीव्र गतिमा सवारी चलाउँदा दुर्घटनाको जोखिम बढिरहेको सन्दर्भमा सुस्त गतिमा सवारी चलाउँदा ज्यान जोगिन सक्ने सन्देश प्रवाह गर्ने अपेक्षा लिइएको छ । प्रतियोगितामा सहभागी हुन इच्छुकले अनलाइन वा बास नेपालको कार्यालयमा पुगेर नाम दर्ता गर्न सक्ने व्यवस्था गरिएको छ ।
प्रतियोगिता कार्तिक २७ गते आइतबार दिउँसो १ बजेबाट सुरु हुने कार्यतालिका रहेको बास नेपालका सूचना अधिकारी हेमराज भट्टले जानकारी दिएका छन् ।