ईद उल फित्र: सामाजिक सद्भाव र सहिष्णुताको प्रतीक

ईद उल फित्र केवल एक धार्मिक चाड मात्र नभएर मानवता, भाइचारा, सहिष्णुता, दानशीलता र सामाजिक सद्भावको प्रतिक हो। यस अवसरमा इस्लाम धर्मावलम्बीहरूले रमजान महिनाभर गरेको संयम, आत्मसंयम र भक्तिलाई एक सुखद समापन दिन्छन्।
यो पर्वको मूल मर्म भनेकै दान (जकात), समानता र मेलमिलाप हो। इस्लाममा समाजका सबै वर्गबीच न्यायपूर्ण संसाधन वितरणमा विशेष ध्यान दिइन्छ। ईदका अवसरमा गरिब तथा असहाय व्यक्तिहरूलाई सहयोग गर्नु इस्लाम धर्मावलम्बीहरूको कर्तव्य मानिन्छ। यसले सामाजिक न्याय र समावेशी संस्कृतिको प्रवर्द्धन गर्दछ।
नेपालजस्तो बहु-धार्मिक र बहु-सांस्कृतिक समाजमा ईद जस्ता पर्वहरूले आपसी मेलमिलाप र सद्भाव बढाउन महत्त्वपूर्ण भूमिका खेल्छन्। धार्मिक तथा सांस्कृतिक विविधतामा एकता कायम राख्न यी चाडपर्वहरूले टेवा पुर्‍याउँछन्।
आजको विश्व परिप्रेक्ष्यमा हेर्दा, धार्मिक कट्टरता र विभाजनको राजनीति हाबी भइरहेको छ। यस्तो अवस्थामा ईद उल फित्रले सबै समुदायलाई सहिष्णुता, समानता र दयाको बाटो अपनाउन प्रेरित गर्नुपर्छ।
ईदले दिने भाइचारा, सहअस्तित्व र दयाको सन्देशलाई केवल मुस्लिम समुदायमा मात्र सीमित नराखी, सम्पूर्ण नेपाली समाजले आत्मसात् गर्न सक्ने हो भने देशमा सामाजिक एकता अझ बलियो बन्न सक्छ।
ईद केवल इस्लाम धर्मावलम्बीहरूको पर्व नभएर समस्त मानवताका लागि प्रेरणाको स्रोत हो। मेलमिलाप, सामाजिक सद्भाव, सहिष्णुता र परोपकारलाई प्राथमिकता दिने हो भने नेपालजस्तो विविधतायुक्त देशमा शान्ति र स्थायित्व कायम राख्न सकिन्छ। ईदको मर्मलाई आत्मसात् गर्दै सबै नेपालीलाई आपसी समझदारी, सहयोग र भाइचाराको भावनाले अघि बढ्न शुभकामना!
ईद मुबारक!