भूपदेव माली,
राजविराज, ०८ जेठ ।
सप्तरीको हनुमाननगर कंकालिनी नपा –४, मधवापुर स्थित धानको खेतमा एक जना युवकको विभित्स रुपमा हत्या गरिएको शव फेला परेको छ ।
भारदह बाजार देखि ५ सय मिटर पश्चिम उपचन्द्र नहर भन्दा ३ सय मिटर पश्चिममा हत्या भएको शवको घाँटीमा धारिलो हतियारले घोपेर मारिएको अवस्थामा भेटिएको हो ।
सोमवार विहान मधवापुरका एक जना यात्रीले शव देखेर ईलाका प्रहरी कार्यालय भारदहका प्र.ना.नी. अनिल रायलाई सूचना दिएपछि तत्कालै प्रहरी टोली घटना स्थलमा पुगेर घटनाको मुचुल्का तथा थप अनुसंधानका लागि इलाका प्रहरी कार्यालय कंचनरुपलाई सूचना पठाएका थिए ।
शव कसको हो र कसले के कारणले मारिएको हो भन्ने अनुसंधान गर्न इलाका प्रहरी कार्यालय कंचनरुपका प्रहरी टोली लागि परेको छ ।
फेला परेकोलाई हेर्दा हत्याराले एक ठाउँमा घाँटीमा धारिलो हतियार घोपेर मारेपछि खुट्टामा रस्सी बाँधी सो रस्सी घिसारदै अर्को स्थानमा लगी जिउँमा लगाएको कटु बाहेक सबै लुगाहरु खोलेर अझ अर्को स्थानमा फ्याकेको थिए । नाक चेप्टो परेको, साँवला रंग भएको शव समान्य परिवारको २५ वर्षको हुन सक्ने आकलन गर्न सकिन्छ ।
