सप्तरी स्थित कोशी पूलमा विङ्गर ठोकिंदा दश जना घाईते

भूपदेव माली,
राजविराज, २३ भाद्र ।
सप्तरी स्थित कोशी ब्यारेजको पुलमा एक यात्रुवाहक विङ्गर एक मान्छेलाई बचाउन खोज्दा गाडीमा सवार १० जना यात्रुहरु घाईते भएका छन् ।
पूर्वबाट पश्चिम तर्फ जाँदै गरेको को १ ज २७९५ नम्बरको यात्रुबाहक सवारी साधन अनियन्त्रित भई कोशी पूलमा ठोकिंदा विङ्गरमा सवार दश जना यात्री घाईते भएको हो ।
घाईते हुने सो दशजना मध्ये कंचनरुप नपा १, बैरवा घर भई राजविराजमा कोठा भाडा गरी बसेकी ३६ वर्षिय विधवा महिला शावित्री देवी यादव, शिकिस्त, हनुमाननगर कंकालिनी नपा १ बस्ने ५५ वर्षिय उपेन्द्र गुप्तालाई खुट्टा भाँचिएको र विहारको सूपौल जिल्लाको गणपतगंज बस्ने २३ बर्षिय विकास कुमार शर्माको हात भाँचिएको हुदाँ उपचारका लागि विराटनगर तर्फ पठाएको इलाका प्रहरी कार्यालयका प्रमुख प्र.ना.नि. चन्द्र प्रसाद यादवले जानकारी गराए ।
घाईते हुने अन्य सात जना समान्य रहेकोले भारदह अस्पतालमा उपचार गराई आ–आफ्ना घर गईसकेको जानकारी प्राप्त भएको छ ।