अनुशासन विपरित कार्य गर्ने नेतालाई जसपाले कारबाही गर्ने

अशोक झा
राजविराज, २३ चैत्र । जनता समाजवादी पार्टी सप्तरीले आफुलाई स्वघोषित उम्मेदबार घोषणा नगर्न पार्टीका नेताहरुलाई चेतावनी दिएका छन् ।
पार्टीका सप्तरी अध्यक्ष केदार प्रसाद यादवले बुधवार एक विज्ञप्ति जारी गर्दै यस्तो चेतावनी दिएका हुन् ।
जिल्लामा कतिपय नेताले आफूखुशी उम्मेदबार भएको भन्दै सामाजिक सञ्जालमा पोष्ट गरिरहेको पाइएपछि पार्टीले कारबाहीको चेतावनी दिएको छ। पार्टीको निर्देशन विपरीत आफूलाई स्वघोषित उम्मेदवार भएको भनी भ्रम फैलाउने क्रियाकलाप बन्द नगरिए जोकोहीलाई पनि अनुशासनको कारबाही हुने विज्ञप्तिमा चेतावनी दिएको छ ।
स्थानीय तहको चुनावमा उम्मेदवार चयन प्रक्रियालाई प्रभावित गर्ने गतिविधि नगर्न÷नगराउन सम्बन्धित सबैसँग आग्रह गर्दै विज्ञाप्तिमा जिल्लामा केही व्यक्तिले पार्टी निर्देशन, विधि, प्रक्रिया र निर्वाचन सम्बन्धी कार्यविधिलाई नै चुनौती दिने गरी आफूलाई उम्मेदवार भएको भनी सामाजिक सञ्जालमा भ्रम फैलाउने गतिविधि गरेको प्रति पार्टीको गम्भीर ध्यानाकर्षण भएको बताएको छ।
जसपा, सप्तरीले वडा देखि पालिका सम्म उम्मेदवार चयन गर्ने प्रक्रिया शुरु गरेको जनाउँदै विज्ञप्तिमा पार्टीको स्थानीय तह निर्वाचन कार्यविधि २०७९ अनुसार उम्मेदवार चयन गरि एक तह माथि सिफारिस गर्नुपर्ने प्रावधान रहेकाले सोही बमोजिम गरिने विज्ञप्तिमा उल्लेख छ ।